Director di SVB a entrega cuentanan anual 2018 na minister

ORANJESTAD - Diamars atardi, director di Banco di Seguro Social, ir. Edwin Jacobs, den presencia di hefe di Departamento di Finansas di SVb, sr. Javier Rasmijn, a haci entrega di e cuentanan anual di e fondonan administra pa SVb y e relato anual di e banco den un forma particular na Minister Dangui Oduber. Director di SVb a entrega e documentonan riba un usb stick, simbolisando asina e transformacion cu SVb ta haciendo di un organisacion burocratico tradicional pa uno moderno y digital. Cu e entrega di e relatonan, SVb ta cumpli cu articulo 16 inciso 2 di e ley di e Banco di Seguro Social, cual ta prescribi cu prome cu dia 31 di mei SVb mester entrega esaki nan.