Minister president Wever a topa cu Mark Rutte y Raymond Knops

DEN HAAG - Dialuna mainta Premier Wever-Croes a reuni cu Premier Hulandes Mark Rutte y secretario di estado Raymond Knops, unda cu a toca varios tema manera e criris di Venezuela y e situacion financiero di pais Aruba. Den un comunicado emiti sinembargo, gobierno ta bisa solamente cu a ‘link’ e tema di finanzas publico den contexto di e impacto di e crisis migratorio di Venezuela’. Segun e comunicado, e reunion a bay bon. “Mi a describi e retonan cu nos tin awor, y esunnan cu nos tin pa enfrenta. Y mi a bise cu comunidad mundial awor mester ‘step up to the plate’ pasobra no ta husto cu nos so mester atende e situacion” Wever a bisa segun e comunicado.  “Pa mi ta importante pa aki na Hulanda nan compronde cu nos ta atendiendo cu e efectonan di un crisis cu nos no a ocasiona, y cu e tin su consecuencianan pa Aruba. E tawata un bon reunion”, Prome Minister a enfatisa.