D66 ta gana eleccion Parlamento Europeo na islanan BES

KRALENDIJK – Partido politico D66 ta ganado di eleccion pa Parlamento Europeo na Boneiru, Sint Eustatius i Saba. Di e 1.827 votonan balido, D66 a sa di haña 1.119 esta 61,9%. Samira Rafaela, e kandidato cu un mama Curasoleño, a haña 959 voto di e 1,106 votonan pa e partido na Boneiru.  Asina gezaghebber Edison Rijna, presidente  di Konseho Supremo Elektoral a duna di conose. Na islanan BES, Rafaela a haña 1.001 di e 1.119 votonan cu D66 a haña.   

Pa eleccion di Parlamento Oropeo PvdA a sali number dos ku 152 voto, esaki ta 8,4 % di e totalidad di voto. Na islanan BES partido CDA a sali como number tres y a haña 112 voto cu ta 6,2 % di tur voto. VVD, partido di prome minister Mark Rutte, a haña 85 voto esta 4,7 %, e partido a sali number kuater. GroenLinks a haña 78 voto ku ta 4,3 porshento di tur voto. 

Pa eleccion di Parlamento Europeo tabatin na tur 15.515 hende na islanan BES ku por a hasi uso di nan derecho di voto. Tabatin  na tur 1.807 voto bálido na islanan BES y 8 no bálido. Tin diesdos votado cu a vota blanko.  Na Boneiru tabatin 12.747 hende cu derecho di voto.  Na e isla 1.555 hende a hasi uso di nan derecho di voto. Na tur tabatin 1.539 voto bálido na Boneiru,  cuater voto no bálido i diesdos voto blanko.