Gobierno a entrega Presupuesto Supletorio 2014 na Parlamento

ORANJESTAD – Gobierno a haci entrega oficial di e Presupuesto Supletorio di pais Aruba pa aña 2014 na Parlamento. A base di e posicion inicialmente diferente cu tin entre Hulanda y Aruba, a busca un forma pa dialoga cu otro y yega na un consenso pa e direccion pa bay. “Pa Aruba ta importante e calidad di bida y no ta ciega su mes pa cifra of maneho di austeridad, los di un obhetivo,” Premier Eman a indica, añadiendo cu “A yega na un presupuesto supletorio cu Reino Hulandes por carga.” Adicional na e Presupuesto Supletorio, gobierno a traha y presenta un ‘Meerjarenraming’ pa e periodo entre 2014 y 2018. Despues di entrega di Presupuesto Supletorio na Parlamento, ta keda na e entidad aki pa trat’e den reunion publico caminda cada Minister ta duna contesta na preguntanan di e Parlamentario, y despues di su aprobacion, ta pasa pa oficina di Gabinete di Gobernador di Aruba, pa esaki duna su firma y bira oficial. Den combersacion cu presidente di parlamento, drs Marisol Lopez Tromp, e la bisa cu "Te cu e momentonan aki, e (presupuesto supletorio) no a drenta ainda na Staten. Asina cu e drenta na Staten, lo mi stipula e fecha nan cu Staten lo trate den comishon central y reunion publico". Pues ainda posiblemente e ta na gobernador di Aruba. 

E presupuesto supletorio ta hinca den otro teniendo cuenta cu e ultimo fase di reformanan di pensioen. “Nos ta mira cu e ‘Financieringssaldo’, cu ta e deficit, na 2014 ta 9.3, pero en realidad ta 4.7% paso ta inclui un contribucion hopi grandi di Pais Aruba di 170 miyon Florin den e fondo di APFA pa duna 100% cobertura pa e fondo di pensioen di ambternaarnan,” Prome Minister a splica. Entradanan adicional specificamente destina pa AZV lo drenta na vigor 1 di december na luga di 1 di september, manera anticipa anteriormente.

Prome Minister Mike Eman tambe a trece dilanti e punto cu Gobierno di Aruba ta trahando riba e proceso di e departamentonan cu ta desea pa bira un N.V. El a menciona con coleganan Minister Oduber ta bezig cu Directie Luchtvaart, Minister Schwengle ta bezig cu Landslaboratorium, Minister de Meza cu Postkantoor y su mes, den Asunto General, ta bezig cu Departamento di Informacion y Automatisacion. Por ultimo, Premier Eman a menciona cu ta trahando riba e creacion di e Aruba Investment Fund como reemplaso pa Fondo Desaroyo Aruba cu ta yegando na final di su existencia despues di 10 aña di inversion riba henter e mehoracion di producto Aruba. NoticiaCla.com a compronde cu e intencion ta pa cuminsa cu tratamento di e presupuesto supletorio mas tarda fin di otro siman pa comienso di e siman siguiente.