Prome minister Wever ta topa Papa Francisco diaranson awor

DEN HAAG – Diaranson awor prome minister di Aruba Evelyn Wever Croes tin un audiencia cerca E sumo pontifice Papa Francisco na Vaticano. Asina e mandatario a confirma for di Hulanda den fin di siman riba su pagina di Facebook. E ta bira e di dos mandatario di Aruba cu ta logra topa cu e lider maximo di e religion catolico. Na 1990 ex prome minister Nelson Oduber tambe a topa cu e lider, e tempo ey sumo pontifice Papa Juan Pablo II cu tabata di bishita na Corsou.

INVITACION

Segun Wever, el a ricibi invitacion di Vaticano pa un audiencia cu Papa di Roma. “E invitacion original a wordo hasi na juli aña pasa momento cu Nuncio di Vaticano a bishita Aruba y a invita mi pa bishita Vaticano. E audiencia ta diaranson awor” Wever a bisa. “Mi ta sintimi hopi honra di por representa Aruba den e ocasion aki y pidi Papa un bendicion grandi pa Aruba” Wever a finalisa bisando. 

PROME BISHITA

Wever no ta e prome mandatario cu ta topa cu un sumo pontifice. Na 1990 e tempo ey prome minister di Aruba Nelson Oduber tambe a toca e honor ey. “Dia 13 di mei 1990 mi a wordu invita pa diosices di Willemstad di cual Aruba ta parti y mi a topa personalmente cu Papa Juan Pablo Segundo .Mi a bay cu mi señora Glenda, Mi mama Felepa, Dangui y Nelson jr. cu a haci su promer comunion serca Papa.Algo historico y bunita” Oduber a recorda pa NoticiaCla diadomingo.