IMAX Cinema na Eagle lo keda cla prome cuartal di 2020

ORANJESTAD - E IMAX Cinema na Eagle lo keda cla prome cuartal di 2020. Asina e compania a bisa den un comunicado diadomingo.  E ultimo dianan aki, automobilistanan a nota trabounan intenso tumando luga na e proyecto di IMAX Cinema Eagle situa riba Sasakiweg. Trucknan di ATCO for di marduga caba a cuminsa basha 800 m3 di concret pa e vloer di e edificio. E fundeshi ta basha caba, pues awor e construccion a drenta un fase nobo cu lo acelera e trabounan. Cada truck di concret ta carga 8 m3 pues ta 100 truck a core bay bin na e proyecto pa asina garantisa entrega di concret fresco pa prepara e vloer fuerte pa sostene e edificio grandi pa acomoda e salanan di cine y compleho di restaurantnan. Den e siguiente dianan lo nota cu pocopoco ta cuminsa arma e structura di hero pa duna e edificio forma. Di e forma aki lo construi e compleho di pelicula moderno y grandi den nos region, cu lo conta cu e tecnologia mas nobo di IMAX, cu ta promove e calidad di pelicula y zonido di mas perfecto na mundo segun e comunicado. 

CONSTRUCCION AÑA PASA

Na october 2018 a rosa e tereno pa construi un edificio di piso, cu ta midi mas di 6500 meter cuadra den Caya Dr. J.E.M. Arends # 8 na Eagle, bisto for di riba Sasakiweg. MetaCorp a yega na un acuerdo cu e compania BOHAMA pa basha e fundeshi te vloer, mientras cu Quick Electrical ta encarga cu aspectonan di coriente y CHS ta encarga cu plumbing, mientras cu e structura di hero ta prefabrica na Hulanda y arma na Aruba. Henter e trabou ta bou supervision di HJC Engineering. Na tur e proyecto aki ta un inversion di 33 miyon florin.

CUPO DI TRABOU

E proyecto di construccion lo caba den e prome kwartaal di aña 2020. Mirando e trabounan andando, e proyecto IMAX Cinema na Eagle ta creando riba 75 cupo di trabou directo y mas cu esey ainda den forma indirecto. Ora e proyecto ta cla, atrobe e lo crea cupo di trabou adicional na mas di 50 trahado den henter e compleho di entretenimiento.

LOGISTICA DI E CINEMA 

IMAX Cinema na Eagle lo consisti di 7 sala normal, mas 2 sala adicional VIP, cu ta bin cu balcon y riba dje 1 sala mas IMAX, pues na tur lo tin 10 sala disponibel pa publico. Obviamente esaki lo bira e compleho di pelicula mas moderno y grandi di nos isla y den henter e region aki. Fuera di salanan di pelicula, IMAX Cinema Eagle lo conta cu 7 espacio pa restaurant na e parti mas abou di e edificio. De facto, publico lo tin hopi opcion ora yega eynan.