ORANJESTAD – E Impacto y consecuencia di hisa e minimumloon por ta dañino pa comercio. Asina e gremio commercial Camara di Comercio a bisa durante un conferencia di prensa diabierna. Segun e gremio, nan a dirigi riba 3 december 2018 un carta na Minister di Asuntonan Social y Labor, Glenbert Croes pa alerta riba e preocupacion cu ta reina den sector priva encuanto e decision pa hisa e salario minimo.
CONSIDERACION
Di e tempo ey caba KvK tabata pidi consideracion mirando cu no ta e momento mas apropia pa introduci un aumento di salario minimo. Sector priva a indica di no tin e capacidad financiero pa ofrece y yuda cubri e gastonan cu esaki lo trece cune. Hopi negoshi tin dificultad pa wanta cabes riba awa y esaki ta forma un peligro pa nan existencia of pa mantene e capacidad laboral.
SALARIO MINIMO
Tin varios factor pakico KvK ta opina cu hisa salario minimo no ta e miho decision. Aruba ta den un region hopi competitivo cu ta capaz na ofrece miho prijs y cu salarionan relativamente mas abou compara cu Aruba. E imagen cu Aruba tin ta cu costo di bida ta mas halto y tanto local como turista ta indica esaki. E impuestonan y primanan social cu a subi ta disminui e poder di compra y haci bida na Aruba mas caro. Varios situacion entre otro di e refineria ta haci cu no tin entrada pa compensa gastonan.
SUBSTANCIA PONENCIA
KvK a presenta Minister cu algun datos pa substancia e ponencia encuanto aumento di salario minimo. Den e datos ta resumi puntonan pakico e decision di aumento no ta faborabel. Aruba ta depende grandemente di turismo. Nos sector di turismo tin cu competi cu islanan den region Caribe cu tin salario minimo mas abou compara cu Aruba. Esaki ta afecta tambe prijsnan den e tiendanan y e ta refleha den nan poder competitivo. Ora compara cu tendencia y cifras mundial, nos por observa cu nos salario minimo ta comparabel cu nivel Europeo. Esaki kiermen cu sector priva di Aruba ta paga bon. Pero ta pa motibo principalmente di impuesto halto e poder di compra ta bira menos. Pa e motibo aki e ta posibel cu un local por cumpra productonan mas barata ora nan biaha pa exterior. KvK kier mustra cu tin formanan mas pragmatico compara cu hisa salario minimo.
ORANJESTAD - Den e prome kwartaal di 2024, por spera cifranan prometedor y solido pa turismo como e pilar di entrada primordial y di suma importancia pa economía di Aruba. Asina e oficina di turismo di Aruba ATA ta raporta diahuebs. A.T.A. ta pone hopi enfasis riba e modelo di “High Value-Low Impact” cu ta para pa un balans entre cuater pilar cu ta e ‘Calidad di Bida di e residente’, ‘Calidad di Experiencia di e Bishitante’, Proteccion y Preservacion di Naturalesa & Medio Ambiente, y Contribucion Economico di e Sector Turistico’.
ORANJESTAD – Diahuebs 14 di maart, Minister di Turismo y Salud Publico Sr. Dangui Oduber a ricibi un invitacion pa bishita Aruba Boutique and Art Hotel cu lo habri nan porta dia 1 di April 2024. Un boutique hotel nobo den curason di Palm Beach cu lo forma parti como miembro di e marca Best Western Signature Collection.
ORANJESTAD – Diaranson mainta 27 di maart Prome Minister Evelyn Wever-Croes hunto cu colega Minister di Finansa Xiomara Maduro a biaha pa Corsou pa reunionan importante den cuadro di e tema di ENNIA.
MIAMI – E compania hotelero Four Seasons awor tambe ta sigui e trend di e compania Ritz-Carlton cu a inicia cu nan coleccion di yate luhoso estilo crucero. E compania a anuncia cu nan tambe ta drenta den e negoshi ey, di ‘espacio di crucero luhoso ultra chikito, cu su prome yate den construccion na Italia. E prome destinacionan ta conoci y ta pa Caribe, cuminsando na 2026. E temporada Caribense lo core di januari pa maart 2026 cu parada na St Barth, Nevis, the Grenadines, Saint Lucia, Barbados, Martinique, Curacao, Aruba y Guadeloupe. Cada bapor lo tin solamente 95 suites, cu ta 50% mas espacio pa persona cu cualkier otro crucero. Cada camber lo tin bentanan gigante di vloer te plafond, hopi vanidad den e bañonan y terras priva. Asina e presidente y CEO di Four Seasons Alejandro Reyna a sigura.
ORANJESTAD – CEO di Aruba Hotel & Tourism Association Tisa LaSorte, recientemente durante e programa Noticiacla LIVE a pidi pa hende na Aruba no bay protesta contra turista na Aruba riba e desaroyo di turismo. Den e video, e ta splica e peticion mas amplio.