AHATA: Falta di coordinacion di aumento di gasto ta haciendo Aruba mas caro

ORANJESTAD – E gremio hotelero AHATA ta preocupa cu no tin coordinacion den e proceso di aumento di gasto cu gobierno ta manehando, cu ta resulta cu nos isla ta bira aun mas caro. Asina e CEO di e gremio ta bisa NoticiaCla. Esaki ta basa riba pregunta di nan preocupacion di un posibel aumento di un gasto pa recohe sushi. Nan a confirma cu riba mesa (actualmente na Raad van Advies) tin un conseho pa introduci un impuesto adicional di US$ 1.50 pa anochi cu turistanan tin cu paga durante nan estadia, cu tin cu bay pa Serlimar. Y esaki, siendo cu segun LaSorte, Aruba ta caro caba pa e turista y cu esaki e ta bira aun mas caro. Y cu tur e gastonan adicional cu lo bin, Aruba lo sigui bira mas caro pa e turista. 

FASE DI REFORMA

Segun LaSorte, nan a wordo bisa door di gobierno, cu tur impuesto relaciona cu turismo, lo wordo revisa y reforma den e di 4 fase di e reforma di impuesto. “Nos no a yega e fase 2 ainda” LaSorte a bisa NoticiaCla, indicando cu ainda ta ‘tempran’. “Pues nos no ta anticipa mas impuesto te ora cu tin un revision di tur impuesto y gasto pa turista” e CEO a sigui bisa. E ta compronde y tin tur comprension cu gobierno tin un tarea grandi pa reforma impuesto, pero kier ta sigur cu tur posibilidad wordo evalua y cu nan (AHATA) tin e oportunidad pa ta participe den e proceso aki.