EY no ta kere cu rapport pa FLPD a haci Endy Croes daño

ORANJESTAD – E compania Ernst & Young (EY) Aruba ta desapunta den e sentencia recien den e caso di FLPD y su ex director Endy Croes, unda cu Corte di Cassacion a culpa EY di a actua di forma illicito pa cu Croes cu un rapport di investigacion contra Croes. Asina e compania a bisa su trahadonan den un memo interno cu e matutino Antiliaans Dagblad ta referi na dje den su edicion di awe y cu lo a bay pa e trahadonan. E compania publicamente mes no a bay afo riba e tema pa duna su reaccion riba e caso. Den e sentencia recien di corte di Casacion manera cu NoticiaCla a raporta e siman aki, corte a duna Endy Croes razon y a acusa EY di no a actua corecto den su rapport contra Croes riba e investigacion cu a haci pa cu irregularidadnan cu Croes lo a comete tempo cu e tabata director di Lotto 10 aña pasa. De hecho Corte den su sentencia a tilda EY di a actua di forma illicito contra Croes door di a stroba Croes di haya un chens husto di wak e contenido di e concepto, y asina minimalisa e chens di Croes pa un bon defensa. Un practica cu segun corte, un compania respeta manera EY no por (a) haci y no mester a haci. E compania den su memo ta sigui splica mas di e ‘historia’ brevemente , y ta bisa basicamente den e memo cu nada no ta cambia nan pensamento pa cu e resultado di e investigacion y a rapport cu a keda publica al respecto, no obstante e sentencia contra nan. Ademas EY ta bisa cu nan no ta di acuerdo cu e contenido di e rapport a c causa daño na Croes. E compania tambe ta sigui bisa cu mientras cu nan ta desapunta den e sentencia, nan no ta cambia e resultado di e investigacion y sigur no nan posicion. Croes durante un conferencia di prensa e siman aki a bisa cu e ta preparando un caso di daño y perhuicio pa e daño cu EY a causa na su persona durante e ultimo 10 añanan. Riba esaki e compania ta sigui bisa den e memo cu AD a referi na dje, cu si tin un eventual caso di daño y perhuicio contra EY, nan lo ta prepara pa defende nan mes vigorosamente y ta confia den un resultado positivo pa EY.