Gomes: Hopi confusion y critica riba grondbelasting

ORANJESTAD – Tabatin un avalancha di critica y confusion desplega e ultimo dianan riba grondbelasting, cu a pone cu Departamento di Impuesto DIMP mester a tene un conferencia di prensa urgente diahuebs mainta pa trece mas claridad. Segun director di DIMP Luenne Gomes Pieters, ta trata mas bien di esnan cu a haya of ta kere cu nan a haya un aumento di grondbelasting. Ta pensa cu e splicacion no tabata porta mucho cla, y como tal a haci e intento pa clarifica tur cos. 

E SITUACION

For di momento cu DIMP a saca e cobransanan di Grondbelasting y gobierno a haci e anuncio e siman aki, a cuminsa haya keho di e grupo di persona cu ta sinti nan mes perhudica. A splica cu tin un grupo di 29.873 persona priva (ciudadano) cu ta registra na DIMP cu tin cu paga grondbelasting tur aña. Cu tur e cambionan introduci e aña aki, gobierno ta premira un ingreso extra di mas of menos 14 miyon florin. A splica un biaha mas cu e reforma introduci na comienso di aña, y cu ta inclui e cambionan di grondbelasting, ta haci pa reparti e peso di un forma mas miho posibel. Esey ta inclui cu cierto hendenan ta bay paga nada mas, otronan un poco menos y un grupo hopi chikito, ta bay paga mas. Pero tur ta wordo compensa.

SUMANAN DIVIDI

Segun Pieters, manera cu e proceso ta aworaki, esnan cu tin propiedad balora entre 120-250 mil florin ta paga 0.2% na grondbelasting. Esnan entre 250-500 mil florin ta paga 0.3%, y esnan cu tin propiedad entre 500-700 mil florin, ta paga 0.4%. E grupo riba 700 mil florin na propiedad ta paga 0.6%. E diferencia ta cu antes tur hende tabata paga e mesun suma di 0.4%. Pa no residente, nan ta paga un ‘flat rate’ di 0.6% na grondbelassting. 

CAMBIONAN

Mas aleu, Pieters a splica cu di e grupo total cu ta registra, cu e cambionan ta nifica cu 8.990 persona (30% di e totalidad) no ta nota un cambio di pago di grondbelasting, pues e cambio no a afecta nan. Pero un grupo grandi, total di 17.779 (60% di e totalidad) awor ta bay haya un rebaho. Pa gobierno esaki ta nifica 2.1 miyon menos na entrada. Un grupo di 3.098 (10% di totalidad) lo conoce un aumento di grondbelasting mientras cu 1859 persona(6%) lo conoce un aumento entre 0 pa 500 florin na grondbelasting, pero e por ta un suma relativamente chikito di 36 florin extra pa aña. Un grupo di 190 persona ta cay den e categoria di tin propiedad entre 250-500 mil florin, tin un grupo di 83 persona cu tin propiedad entre 500-750 mil florin y 967 persona cu tin mas di 750 mil florin na propiedad priva. Entre nan tin 1239 persona (4%) cu tin cu paga mas di 500 florin na grond belasting. 

CAMBIO DI BALOR

Un otro critica cu tin, ta cu hende ta pensando cu a bolbe balora nan propiedad y asina haci e cambio necesario. Esaki sinembargo segun Pieters, no ta berdad. Pa e ultimo 5 pa 10 aña no a haci recalculacion di propiedad pues no por papia cu a rebalora e propiedad di e persona. Aworaki ta den un periodo di 5 aña (2017-2021) cu no ta haci recalculacion. Pues e proximo periodo pa recalcula ta despues di 2021. De hecho e periodo prome cu 2017, tampoco no a hacie. Pues tur e alegacionan di recalculacion, no ta cuadra cu berdad y tur hende por keda trankil.