Ley contra exportacion ilegal di koper pa frustra e negoshi lucrativo

ORANJESTAD – Ladronnan di koper lo mester tin mas dificultad pa deshaci of bende koper cu nan horta, den futuro. Por lo menos esey ta e intencion di gobierno proximamente. Minister di husticia Arthur Dowers a confirma na NoticiaCla.com dialuna atardi cu gobierno a entrega un concepto di ley na Raad van Advies, unda cu ta prohibi exportacion di koper, sin cu tin un permiso valido pa haci tal. Mientras cu e mandatario ta conciente cu e ta un di e hopi formanan, e ta convenci cu esaki ta un forma clave cu ta frustra e negoshi lucrativo di koper como exportacion. E ley aworaki a bay Raad van Advies pa conseho, pa despues e sigui pa gobernador cu tin cu firma esaki den un ley.

E idea no ta uno nobo, y e ley tampoco. Den e caso aki ta añadi un producto ‘nobo’ riba e lista di productonan prohibi pa exportacion sin permiso. Algo cu aworaki no ta e caso cu e producto di koper. Un persona cu kier exporta koper, lo mester solicita pa un permiso serca dept di asunto economico, cu tin cu stipula e rekisito pa e persona cumpli cune. “Un di e rekisitonan ta e.o. cu e koper mester ta registra, pisa etc, cu ta nifica cu si haya falta di cierto koper na cierto facilidad, por mira ken tabata envolvi” Dowers a bisa.

Manera ta conoci, y Dowers a confirma e disgusto aki na NoticiaCla.com, hopi hende ta traha duro pa yega na nan cas of edificio, solamente pa nan bira victima di ladronnan di koper, cu anochi ta horta e koper cu a keda instala porta e mesun mainta ey. “Hendenan cu ta horta koper ta hende sin consenshi” Dowers a bisa. “Bo no por ta bendedo di koper y ta tuma koper di cualkier lugar pa bende sin mas”. E proceso di ley tabata uno largo, pero cu awor ta asina lew cu a entrega e ley pa e por keda cla.

E mandatario ta convenci cu esnan cu horta koper, ta pasobra nan tin intencion di exporte, y awor esey ta bira un poco mas dificil. Esey no ta kita afo cu por intenta esaki di contrabanda, pero por lo menos a sera un porta mas pa asina frustra e ladronicia popular aki.

Tabata diabierna ainda cu e mandatario di enseñansa Hooyboer tabatin reclamo riba e asunto aki y tabata sclama pa ayudo. “Den bes cu nos nota cu e problema ta disminuyendo, e ta aumentando!”, asina Minister Michelle Hooyboer-Winklaar a vocifera den fin di siman. E ta referi na e hortamento di koper na scolnan tur rond di nos isla. “Den e fin di siman aki atrobe a horta koper di 4 diferente scol, forsando Gobierno pa haci milager den weekend pa por drecha e scolnan cu urgencia”. A splica cu ta trahando riba adaptacion di leynan y cu lo intensifica patruyanan rond di nos scolnan, pero e realidad ta cu ta raportando mas caso di ladronicia di koper e ultimo simannan.