ATA: Cayman Islands ta considera Aruba un role model pa turismo

ORANJESTAD– Cayman Islands ta considera Aruba un role model pa turismo. Asina un delegacion di ehecutivo di turismo di Cayman Islands a bisa durante nan bishita na Aruba e siman aki. Asina oficina di turismo ta bisa den un comunicado. Tabata e siman aki pues cu Aruba a yama bonbini na un delegacion di ehecutivonan relata cu turismo procedente di Cayman Islands. Anualmente e delegacion ta scoge un isla den region Caribense of otro destino, pafo di nan propio destinacion, pa reuni riba diferente aspecto turistico importante. Tambe nan ta reuni cu socionan local di e isla / pais pa asina enfoca riba temanan di interes y intercambia di pensamento.

E delegacion di Cayman Islands tawata consisti di diferente ehecutivonan entre otro Honorable Deputy Premier & Minister of Tourism Moses Kirkconnell, Chief Officer & Permanent Secretary Stran Bodden, Director of Tourism Rosa Harris. A reuni cu Minister di Turismo di Aruba, y otro socionan local incluyendo ATIA, AHATA y miembronan di e ekipo di Aruba Tourism Authority.  

E delegacion ta considera nos destinacion como un isla ‘high end’. Tambe ta consiente cu nos isla su GDP ta consisti pa 90% di turismo (directo, indirecto y induci). Teniendo esaki na cuenta, Cayman a expresa nan interes pa conoce mas di Aruba su exito den turismo. Riba e pregunta kico nan ta pensa pa cu turismo den e region Caribense, nan ta di opinion cu Aruba ta sirbi como un role model.

Cayman Islands ta depende 60% di turismo y ta conta cu un populacion total di 60.765 habitante. Nan mercado principal ta –igual cu Aruba: Norte America. Aña pasa a ricibi un total di 463.000 stay-over arrivals & 1.9 miyon cruise arrivals. Riba potret por mira ehecutivonan di Cayman Island y Aruba Tourism Authority.