OM a sepone e caso contra ex minister Steven Martina condicionalmente

WILLEMSTAD – Ministerio Publico a sepone e caso contra ex minister Steven Martina condicionalmente. Den un comunicado, OM ta bisa cu nan “ a termina e investigacion contra di ex-Minister di Desaroyo Ekonómiko, Dr. Ir. I.S. Martina i a tuma e desicion pa sepone e caso bou di cierto condicion”.

Na fin di 2017 varios persona a hasi denuncia contra di señor Martina. E lo mester a actua contra di e Lèy di Integridat (candidato) Minister (Landsverordening). Riba 24 di mei 2018 a duna Landsrecherche orden pa cuminsa cu un investigacion di hechos (feitenonderzoek). E resultadonan di e investigacion aki a pone cu a cuminsá un investigacion penal.

Fiscal a evalua e investigacion di Landsrecherche Corsou. A base di e investigacion aki, OM a yega na e conclucion cu personanan cu tabata envolví den e proceso di screening mester tabata mas atento pa evita e mínimo chens pa tin un conflicto di interes.

OM ta concluí cu señor Martina, den Conseho di Minister, a tuma parti den e proceso pa tuma desicion tocante consepto di lèy pa cambia tarifa di seguro WA obligatorio. Door ku señor Martina na e momento ei tabatin accion den un compania di seguro, e tabata tin un interes comersial den e desicion. Pa e motibo aki a base di e Lèy di Integridad, e no por a partisipa na tumamento di e desicion aki. Awor cu esaki a sosode, segun OM, un hecho castigabel a wòrdo comete. 

Meta di Parlamento di Corsou tempo a traha e Ley di integridad tabata pa evita tur chens pa un conflicto di interes. For di e investigacion a sali na cla ku den ehecucion di e Ley aki no ta tur ora actua cu cautela.

Despues cu a tuma tur hechonan den consideracion, OM a yega na e conclusion cu e debate di con pa aplica normanan di integridad mester bai den Parlamento, Conseho di Minister i cerka e políticonan. 

OM ta haña di sumo importancia pa den e (prome) caso riba tereno di e Ley di Integridad cu ta existi relativamente cortico, duna espacio pa e debate. Esaki tambe ta un di e motibunan cu un persecucion penal no ta oportuno na e momentunan aki i a dicidi di seponé e denuncia contra señor Martina condicionalmente. No ta conoci si Martina awor ta bolbe bek como minister.