Arends: Partido AVP lo no vota pro e ley nobo di LAFT

ORANJESTAD – Fraccion di AVP lo no vota pro e concepto di ley LAFT nobo, ni cu e amienda cu ta wordo presenta pa fraccion di MEP dialuna awor. Nan no a wak e amienda ainda, pero asina mes Arends ta bisa cu e partido lo no vota pe. E intencion ta pa trata e ley dialuna, pero te cu awe ainda esaki no a wordo yama ainda segun informacion cu NoticiaCla a ricibi awe mainta. Pero den e programa NoticiaCla LIVE cu moderador Tito Laclé, Richard Arends a bisa cu e fraccion berde lo no vota pro. Nan ta haye e.o. superfluho pasobra e supervision tabata supone di caba na 2018. Segun Arends, e ley ta contene solamente 10% di e loke a wordo palabra den e protocol. Entre otro, tabatin un lista di regla di presupuesto, cu no ta hinka den e ley aki. A palabra cu mester bin un meerjaren begroting, cu no ta aden, y e parti di meevallers (entrada incidental) mester ta pa paga e deficit. E ley segun Arends, (y fraccion di AVP)  no ta conforme e boluntad di parlamento. Segun Arends, e mocion di AVP pa regla tur esaki, a keda rechasa pa Parlamento. Algo cu partido MEP a bisa cu no ta berdad pasobra e mocion no tabata necesario pasobra ya MEP a regla esaki. Otro punto cu Arends ta mustra ta cu e separacion di entrada y gasto tampoco no ta den e ley. Pues basicamente segun Arends, compara cu e protocol, e ley aki ta hopi mas invasivo cu e protocol firma algun tempo atras. Por wak e programa completo AKI.