ORANJESTAD - Durante e luna di mei Aruba y salubridad ta pone hopi enfasis riba sa bo numbernan y con pa evita hipertension, p’esey Dr. Horacio E. Oduber Hospital tambe ta join e campaña nacional cu ta pone enfasis riba “sa bo numbernan” y e importancia pa preveni presion halto. Ta papia di presion halto na momento cu esaki ta 140/90 of mas halto. Prevencion ta cuminsa cu un estilo di bida saludabel na unda ta mantene un nutricion balansa y door di reduci e consumo mucho halto di salo. Riba un dia normalmente mester consumi 6 gram di salo, pero e realidad ta cu ta consumi 2 biaha of mas cu e cantidad aki riba un dia.
Consumi demasiado salo ta locual por hisa of influencia e numbernan di bo presion. Con pa reduci e sobre uzo di salo cu nos ta hinca den nutricion ta door di pone mas atencion riba cumindanan procesa, asina Angelique Salsbach, dietista di hospital a duna di conoce. Den cumindanan procesa tin sobrecarga di salo bo no ta smaak necesariamente of hera bo no ta smaak e mes. Locual ta considera cuminda procesa y yena cu salo ta tur loke ta bin ya cla of casi cla pa uza pues den bleki, den paki, pochi, saus ya cla cumindanan “frozen”, manera pizza, soseishi etc. Por ehempel un pizza “frozen” ta contene casi e cantidad maximo di salo cu bo lo mester come durante henter pa dia, pues 6 gram.
Si bo ta custumbra di come constantemente productonan procesa di pochi y bleki, esey ta indica cu bo ta hayando hopi salo den bo alimentacion. Por preveni esaki door di reduci e uzo di productonan procesa y come mas producto fresco.
Si compara berdura den bleki y berdura fresco, por bisa cu e berdura fresco tin solamente 5 miligram di sodium (salo) pero esun di bleki tin casi 700 miligram di sodium (salo). Tene na cuenta cu 1 gram di salo ta contene 400mg sodium. Por uza bonchinan fresco cu bo mes por laga “soak” y prepara na luga di haci uzo di bonchi den pochi, uza batatanan fresco y no esunnan al instante. Asina ey por menciona tur forma procesa, pero recomendabel ta uza nan mas tanto posibel den nan forma fresco.
Soya saus tin hopi salo y p’esey semper ta bon pa lesa e label y purba di mantene bo mes na no mas di 350 miligram di sodium pa cada cuchara di saus di soya. Ta recomendabel pa incorpora fruta y berdura den nos alimentacion. Tur dia 2 porcion di fruta y 1 pa 2 porcion di berdura. Esaki lo sirbi como un fuente di potasio cu ta yuda preveni presion halto.
ORANJESTAD – Mas cu mitar di studiantenan local (Aruba) cu a studia usando e prestamo escolar ‘Dienst Uitvoering Onderwijs voor studenten en scholieren’, conoci como DUO, tin problema pa paga esaki bek , ta paga menos cu nan mester paga, of mas pio, no ta paga nada bek mes. E grupo aki ta sigui ta un problema segun representante di DUO, Marit Verbogt manera cu e la splica diahuebs den e programa Noticiacla LIVE. Si tin mas of menos 4000 ex studiante cu tin cu paga bek, y ta algo di mas di mitar tin e problema, por deduci cu e cantidad aki ta mas cu 2 mil studiante local. Verbogt ta splica kico e situacion ta, den e video adhunto. E siman aki e representantenan ta na Aruba te cu otro siman diabierna pa atende cu e grupo aki y tambe studiantenan cu kier un beca via DUO. Nan por acudi na e centro John F Kennedy durante oranan specifico cu ta ubica riba e pagina di FB di nan y tambe e portal di DUO.
ORANJESTAD – E situacion di Dengue na Aruba ta birando mas alarmante. Diahuebs Departamento di Salud Publico a informa cu a cuminsa hospitalisa hende cu ta infecta cu Dengue. Ta trata di 2 persona. Un di e personanan aki ta bek na cas, y e otro ta sigui interna cu complicacionnan serio debi na Dengue. Por a verifica cu ningun di e personanan aki a biaha recientemente, indicando cu ta trata aki di dos caso di Dengue di transmision local. DVG ta informa tambe cu ta observando mas caso cu ta di spera – of cu ta normal – pa e temporada aki.
ORANJESTAD - Entrante augustus 2024 e alumno di klas 1 lo siña lesa y skirbi na Papiamento. A organisa un trayecto di preparacion pa asina ekipa e cabesante y e maestro di klas 1 di scolnan basico (basisschool) cu e hermentnan necesario pa por implementa e parti aki di e maneho nobo di idioma den scol.
ORANJESTAD - Entrante 18 di april 2024, pa 9or di anochi via TeleAruba, Aruba completo lo por cuminsa presencia e serie documental ‘Blue Lizard Effect’. Un serie documental revolucionario cu ta profundisa su mes den e mundo fascinante di Aruba, pero di un angulo diferente. E serie ta explora e concepto energetico di felicidad y e conexion profundo cu e cultura, e hende, y naturalesa di e isla.