Mayornan a lubida nan baby recien naci den un taxi na Alemania

BERLIN – Un pareha di Hamburg (Alemania) a lubida nan baby recien naci den un taxi recientemente. Asina e portal Hulandes RTL Nieuws ta raporta. Ta normal cu un hende ta lubida un bril, su telefon, of un cartera. Pero no un baby. Ta ora cu e taxi a core bay, e pareha a realisa kico a sosode, pero no a logra para e taxi mas. E taxista mientrastanto a bay lunch, y ta despues di lunch, cu el a busca un siguiente cliente, a nota e baby den e auto, na soño. Mesora a bati alarma, y via polis, a uni e mayornan cu e baby recien naci. E baby tabata bon di salud, danki Dios. 

RECIEN NACI

E mayornan a caba sali di hospital unda cu e nan baby recien naci a caba nace y a tuma e taxi pa nan cas. Na cas, a paga e taxista y a simplemente lubida cu nan tabatin un yiu mas (nan tin un yiu di un aña tambe). E taxista a sigui su caminda, sin nota e baby patras. Despues di e lunch e taxista a bay aeropuerto pa busca su siguiente cliente, cu a nota e baby. Un ambulance na e sitio a check e baby cu a resulta den bon estado. NOTA, e potret di ANP, ta djis un ilustracion di un taxi na Berlin y no ta e taxi en cuestion.