Iluminacion special na e estatua di Boy Ecury

ORANJESTAD - Den cuadro di 70 aña di conmenoracion di morto di Boy Ecury, ministernan Paul Croes y  Benny Sevinger den cooperacion cu DOW y sector priva, a percura pa duna e parke chikito rond di e estatua di Ecury un toke special, dor di percura pa iluminacion adicional .

Segundo Jorge Adelberto (Boy) Ecury a nace na Aruba na april 1922 y a fayece dia 6 di November 1944, pues exactamente 70 aña pasa. E tabata un miembro di e Cuerpo Militar Hulandes durante e di dos guera mundial. Su amigonan a dun’e e number di cariño “Boy” cu ta e nomber cu tur hende ta cord’e tambe awendia.

Dia 5 di November 1944, despues cu su mesun colega a traicion’e, a gara Boy Ecury y a interog’e, tortur’e pero el a nenga di traiciona su amigonan. Su mañan, cu apenas 22 aña di bida, un grupo di militarnan Aleman a fusil’e. Su tata a trece su restonan mortal bek Aruba na aña 1947, unda nan a der’e cu tur honor militar. Dos aña despues a construi e park y e estatua riba dje, den cual e honra Boy Ecury como un heroe nacional. Na aña 1984, pues 40 aña despues di su morto ainda Gobierno di Hulanda a honr’e cu e cruz conmemorativo di heroenan di Resistencia militar.