Tjon: E siman aki Parlamento lo pidi ARA pa investiga FLPD

ORANJESTAD – Parlamento di Aruba lo manda un carta e siman aki pa Algemene Rekenkamer (ARA), pa investiga Fundacion Lotto pa Deporte (FLPD). Asina e lider di fraccion di MEP Rocco Tjon a confirma pa NoticiaCla diamars mainta. Segun Tjon, manera ta conoci, recientemente ARA mes a manda un carta pa Parlamento den cual nan a confirma cu nan tin un base legal pa haci un investigacion den FLPD.

INVESTIGACION

Segun Tjon, e siman aki e presidente di Parlamento Ady Thijsen lo firma e carta y manda esaki pa e organo menciona den cual lo defini kico Parlamento lo kier pa nan investiga. Parlamento ya caba a reuni riba e topico aki siman pasa y a yega na e decision cu kier pa ARA haci un “rechtmatigheids” y “doelmatigheids” onderzoek den Lotto pa deporte.

FONDO

Loke cu segun Tjon, Parlamento kier sa, si tur e fondonan ta wordo uza pa e meta cu e mester wordo uza. Y si tur esaki ta cana segun ley. Den cuadro di esaki lo haci un apelacion na ARA pa dentro di nan investigacion nan analisa y evalua tur documento, nota di reunionnan, tur gasto cu a wordo haci y tambe kende a cobra pa e servicionan y si esaki ta cuadra cu Statuut y si e tawata necesario.