Vocero Plasterk: Incumplimento di acuerdo a conduci na aanwijzing awe

ORANJESTAD – Incumplimento di e acuerdo di siman pasa, ta e motibo principal pa e aanwijzing pa awe. Esaki e vocero di minister Ronald Plasterk, esta Tijs Manten a bisa NoticiaCla diabierna mainta. “E motibo cu Aruba no a haya e aanwijzing siman pasa, ta pasobra siman pasa ainda tabata parse cu partidonan a haya otro y tabatin un acuerdo entre Aruba y Hulanda” Manten a sigui bisa NoticiaCla. “Esey no tabata e caso den e siman cu a surgi, y como tal Conseho di Reino a tuma su decision awe”.

Tabata notable segun Manten cu tabatin dificultad pa materialisa e acuerdo y pone den operacion. Y tabatin basta corespondencia e siman aki entre gobierno di Aruba y Hulanda. “Y ta durante e corespondencia a haya e interpretacion cu cos no a cana y como tal e decision di awe. E ta asina urgente y necesario pa un investigacion di e presupuesto tuma lugar, cu e orden a bin na gobernador diabierna mainta.

Loke tambe e vocero di Plasterk a confirma na NoticiaCla ta, cu e aanwijzing di awe diabierna, e ‘acuerdo’ di siman pasa a wordo bari for di mesa y no ta valido mas. Tur cos ta den man di gobernador, y Hulanda ta considera cu no tin acuerdo mas cu Hulanda. E orden awor ta pa gobernador haci e trabou necesario, y pa dentro di 2 pa 3 siman bin cu un resultado. “E mester tin e tempo necesario pa por haci su trabou, y como tal esey ta e tempo cu e tin pa haci'e ” Manten a haya. E hecho cu gobierno di Aruba a informa publicamente cu e no ta bay coopera cu cualkier acuerdo di gobierno di Reino, Manten no kier a reacciona ariba.