- AZV: Otro luna tin traspaso automatico di clientenan di dokter Vink pa HOED Piedra Plat
- SETAR a tene su Avigilon ALTA Launch Event cu enfoke riba e futuro di seguridad
- Grupo grandi di ex studiante tin problema pa paga nan Duo lening bek
- CBS: Bestaansminimum a subi atrobe na Aruba debi na aumento di gasto di cuminda
- Figaroa: Proximo gobierno mester consisti di solamente vakministers
Corte di Casacion: Ernst & Young a actua ilegal contra ex director FLPD Endy Croes
ORANJESTAD – E compania di accountant Ernst & Young (EY) a actua illegal pa cu ex director general di Fundacion Lotto pa Deporte (FLPD) Jan Hendrik ‘Endy’ Croes. Y como tal Corte di Casacion ta mantene e sentencia di Hof di Croes di 16 di januari 2018, rechasando e peticion di EY pa revoca e sentencia ey. Asina e sentencia a cay diabierna ultimo di Corte di Casacion, cu ta un veredicto final. EY no por apela e sentencia aki. Dialuna Croes y su abogado Anthony Ruiz a duna nan comentario riba e caso.
E CASO
Corte di Casacion a determina cu basa riba regla y e liña di maneho di un compania responsabel y acredita manera EY, nan (EY) no a actua corecto door di e.o. nenga pa comparti e concepto di rapport di e investigacion contra Croes (FLPO a pidi EY haci e investigacion den practica considera incorecto di mal uso di fondo durante periodo cu Croes tabata director general), perhudicando Croes asina di por tin un preparacion adecua como su defensa. Segun corte, e prohibicion aki di parti di EY pa Croes haya y wak e rapport, no ta hustifica. Ademas ta papia di un combinacion di un ’proceso incorecto di refutacion (wederhoor), algun irregularidad den e rapport final y algun falta di claridad tambe’.
BISTA NEGATIVO
Esaki ta conduci na e hecho cu e rapport final di EY contra Croes, a presenta un bista mas negativo pa Croes. Ademas segun Corte, EY no a presta atencion na e interes di Croes, door di manda e concepto di e rapport den e forma cu el a mand’e. “EY no a haci suficiente pa evita e situacion indesea aki” Corte di casacion ta sigui bisa den su sentencia. Y corte ta bisa tambe cu pesey e ta yega na e conclusion final cu EY a haci su mes culpable na un acto illegal door di presenta un rapport cu no ta cumpli cu e reglanan corecto manera mester spera di un compania reputable di accountant, den cuadro di un rapport profundo pa cu e persona (Croes) na FLPD (Fundacion Lotto pa Deporte).
REACCION ABOGADO
E abogado di Croes, Anthony Ruiz a reacciona hopi indigna riba e forma di proceder durante e conferencia di prensa dialuna mainta. Ruiz a repasa grandemente e fayonan cu EY a comete pa cu su cliente, y cu basa riba e hechos, nan (Croes) a gana su caso. Awor ta keda solamente pa cuminsa un caso di daño y perhuicio, aunke esaki lo nunca recompensa y restaura e imagen cu a wordo kibra di su cliente. Algo cu Croes tambe despues a confirma. E daño ta haci y ningun suma di placa por restaura e daño, Ruiz a sigura prensa. Ta premira un siguiente bataya cu por dura 10 aña atrobe, ya cu no ta kere cu EY lo entrega asina facil. Pero awor e caso lo bay mas sigur entre Croes y e compania di seguro di EY, ya cu ta den e direccion ey e caso lo bay. Croes mientrastanto fungiendo un aña y mei como parlamentario pa partido MEP, a gradici tur esnan cu a sostene y a bisa cu e ta cla pa e siguiente ‘guera’. Por lesa e veredicto AKI.
Corte: Caso ‘Isla di Oro’ ta sigui fin di luna awor, cu mesun huez
ORANJESTAD – E caso riba proyecto Isla di Oro, cu a para ora cu a purba ‘wraak’ of destitui e huez en cuestion, ta continua fin di e luna aki, esta dia 29 di April proximo. Tabata dialuna cu corte a dicidi cu e peticion pa ‘wraak’ e huez, no ta valido y como tal e huez por continua trata e caso sin mas. For di informacion cu noticiacla a haya, ta mustra cu e caso lo no dura mucho largo mirando cu tabata practicamente na final di e tratamento, cu e peticion di ‘wraak’ e huez a keda solicita. E caso lo cuminsa pa 2’or y mei di atardi.
Corte a rechasa peticion di gobierno pa kita (wraak) huez di caso Isla di Oro
ORANJESTAD – Corte dialuna (tres huez) a dicidi cu e huez cu tabata trata e caso sumario entama pa Parke Arikock contra di proyecto na ex Isla di Oro, por keda trata e caso aki. Cu esaki e ta rechasa e peticion di parti di Gobierno di Aruba pa destitui y reemplasa e huez en cuestion di e caso en cuestion, A.vd L, di e caso, na Hulandes conoci cu e termino di ‘wraken’. Cu esaki, e caso por continua awor cu e huez en cuestion tratando esaki. E abogado di gobierno a demanda pa e huez en cuestion keda destitui di e caso, debi cu tabata parce cu e huez lo a mustra parcialidad pa cu e caso. Ora cu tin un situacion asina, e abogado por pidi pa kita e huez, osea ‘wraak’ e huez.
OM: Awor Aruba tin hende certifica den Terapia di famia multi dimensional
Abogado Gomez: Leynan pa castiga abuso di bestia, ta deficiente
ORANJESTAD – Leynan y castigonan consecuente pa castiga matralto di animal (mascota) ta hopi deficiente. Asina abogado mr Lincoln “Dello” Gomez a constata e fin di siman aki. Segun e abogado, e ta referi na e caso di e cacho cu a conoce un maltrato cu a conduci na su morto finalmente. Cu esaki pueblo a pidi castigo pa e persona aki. Pero segun e abogado, e ta keda desapunta cu e leynan cu tin den un caso semejante. E abogado ta splica den e video.
Manera anticipa pa Noticiacla: Ex minister Besaril a recobra su libertad
ORANJESTAD – Manera cu Noticiacla.com a informa un dia prome, awe diabierna ex minister Guilfred Besaril a recobra su libertad, despues di tabata deteni pa 24 dia. Diahuebs e portal aki a informa cu Ministerio Publico no ta bay pidi pa prolonga e detencion di e ex minister, a lo menos cu Huez Comisario dicidi otro. Den e caso aki, e HC a opta pa bay cu OM, y a laga sr Besaril den libertad. Esey no kier men cu e ta liber di tur cargo, sino cu e no mester ta encarcela mas mientras cu e investigacion den e caso Tulipan ta sigui. E ta wordo acusa di entre otro malusa su funcion di minister, malversacion y estafa tempo cu e tabata den funcion na Hulanda como minister plenipotenciario durante e prome gabinete Wever Croes.
Ex minister Besaril por recobra su libertad diabierna
ORANJESTAD – Diabierna awor (8 di maart) ex minister Guilfred Besaril por recobra su libertad atrobe. Esaki despues di a sinta su dianan den pre aresto. Ministerio Publico diahuebs a confirma pa Noticiacla cu e periodo di 16 dia encarcelacion ta termina diabierna awor, y no tin intencion di pidi prolongacion.” OM no a pidi pa e sigui den detencion, dus una vez su termijn ta cla, hoogstwaarschijnlijk e lo bay den libertad” e vocero Ann Angela a sigui bisa. Esey no ta nifica cu e investigacion a termina. “ E investigacion ta sigui cana” Angela a sigui bisa. Ta solamente cu e termino stipula ta vence. Si e Huez Comisario sinembargo dicidi di prolonga esaki un biaha mas, e lo bira pa 60 dia. Pero mester bisa mesora, cu si esaki ta e caso mes, no ta nifica cu e ex mandatario tin cu keda sinta tur e 60 dianan.
Follow NoticiaCla
