Corte: Staring por traha bek mesora como director DVG

ORANJESTAD – Jerry Staring por bolbe mesora na trabou den function di director di Departamento di Salud. Asina corte a dicta awe mainta dialuna cu Staring mester traha den otro funccion, y como tal a suspende e orden ey di forma inmediato esta esun di 15 di maart 2019 cu ta bisa cu Staring pa 12 siman mas, mester eherce un otro funccion, cu no ta esun di director. E sentencia ta drenta na vigor mesora, pendiente tratamento di e ‘bezwaar’.

E CASO

Manera ta conoci for di mei aña pasa, a hala Staring un banda despues cu tabatin kehonan den e departamento. A suspende Staring prome, y despues di un sentencia di huez, a dicidi cu Staring por traha bek, pero den un otro function cu no ta esun di director. A sigui un cantidad di caso contra otro, unda cu algun a keda gana pa Staring y otro pa gobierno. Gobierno ta cuestiona e prestacion di Staring, y e ultimo aki tabata cuestiona e interes di gobierno pa cu e proceso. Y cada bez, for di aña pasa, gobierno tabata prolonga e period cu Staring mester a fungi den un otro funccion, cu 12 siman. E ultimo tabata na maart ultimo. Riba esaki un biaha mas Staring a bringa e decision ey. E biaha aki huez a dicidi otro. 

MOTIVACION

Huez a usa varios argumento, pero esun principal ta cu gobierno no por sin mas sigui prolonga e decision di laga Staring traha den un otro function. E investigacion no por continua eternamente y mester bin na un solucion liher. Mientras cu e medida impone, no ta mishi cu e parti financiero di Staring, y como tal no ta perhudike, e ta strobe si den su carera futuro y su placer di trabou. Ademas mester a specifica mas hopi kico e motibo di e medida ta. Y como cu esey no a sosode convincentemente, corte a haya cu no por prolonga e medida pa un di tres biaha. Lesa e sentencia AKI.