Minister no ta di acuerdo cu a usa militarnan pa asisti cu un control

ORANJESTAD - Minister di husticia Andin Bikker no ta wak e motibo dicon Ministerio Publico a acudi na asistencia militar den e forma haci den e caso recien na un supermercado na Dakota. Asina e mandatario a reacciona riba e keho di sindicato di polis SPA, cu a critica e hecho cu ministerio publico a autorisa militarnan di MZK pa yuda cu e control, anto arma. NoticiaCla a compronde sinembargo cu e control tabata completamente dentro di margen di ley, segun su fuentenan. 

PROPOSICION

Minister Bikker basa riba e caso aki, a bisa cu e lo propone na Conseho di Minister pa considera restringi asistencia militar solamente na casonan caminda cu e peticion ta sali for di Cuerpo Policial, cual ta e organo central di combatimento di criminalidad y mantencion di orden publico. El a bisa tambe cu e lo informa Ministerio Publico di esaki. Esaki mirando cu un par di biaha caba e comunicacion riba e procedura a resulta di no ta bay optimal, cual ta trece consternacion innecesario.

LEY DI ARMA

Investigacion cu e portal aki a haci, ta mustra sinembargo segun ley di arma, (art 2 inciso 3), mariniernan ta debidamente autorisa pa cana arma na Aruba. Banda di esey, nan tin un permiso por escrito di PG pa por carga arma. Pues aki ta mustra cu OM lo a debidamente cana su caminda legal, aunke cu porta e mandatario no ta contento cu e operacion aki.