Tjon: Cu un amienda, ley di LAFT lo keda coregi segun constitucion

ORANJESTAD – E intencion ta pa Parlamento di Aruba (lesa fraccion di MEP y POR) haci e cambionan necesario na e concepto di ley LAFT, pa asina e bira un ley cu ta conforme constitucion. Algo cu awor sigur e no ta. Asina lider di fraccion di MEP Rocco Tjon a bisa den e programa NoticiaCla LIVE diahuebs anochi. Riba e pregunta di e moderador Tito Laclé, si e fraccionan respectivo lo bay vota contra e ley actual dia 27 di mei proximo, el a bisa cu esey lo no ta necesario, pasobra nan lo entrega un amienda cu e cambionan necesario, y cu e amienda, e ley lo bira uno cu nan por biba cu ne y ta cumpli cu constitucion. Algo cu awor pues no ta e caso. 

INTEGRAL

E amienda lo contene tur e puntonan cu Raad van Advies a inclui den su conseho di e ley, y ta varios punto nan ta cu mester wordo cambia segun Tjon. Contrario cu gobierno, nan si (esta e fraccionan MEP y POR) si lo inclui e cambionan di RvA den e amienda, cu lo ‘coregi’ e problemanan cu tin aworaki den e ley. 

MISHI CU E LEYManera cu e situacion ta aworaki, e no ta duna Parlamento e autoridad necesario pa por fungi como esun cu tin maximo autoridad. E ta mina nan derecho di entre otro budgetrecht, y asina tin mas aspecto cu segun Tjon, no ta corecto. No por ta asina cu p.e. e ley por wordo aproba pa Parlamento, firma pa Gobernador,  y despues por wordo cambia of manda bek pa Rijks Ministerraad y of cu consecuencia cu Hulanda por duna Aruba (Gobernador) un aanwijzing cu tin cu wordo ehecuta pa e propio Gobernador, cu inicialmente a aproba e ley. 

RECHASO HULANDAE pregunta ta keda, kico ta pasa si Hulanda rechasa e version ‘nobo’ cu Parlamento aproba incluyendo e amienda cu nan lo entrega dia 27 di mei proximo ora cu e ley wordo trata. Segun Tjon, e no por kere cu Hulanda lo rechasa esaki, teniendo na cuenta cu Hulanda semper ta boga pa funciona den margen di ley. “Si esey no sosode, nos lo tin un situacion hopi serio”, Tjon a bisa. Mientras cu e no a bisa kico exactamente e kier men cu esaki, por pensa den un debate entre gobierno di Hulanda y Aruba unda cu lo tin cu bay delibera cu otro riba un nivel mas halto, esta cu gobierno di Reino riba e tema. Pero loke si Tjon a bisa, ta cu nan lo bringa esaki  na instancianan internacional, y por pensa riba instancianan manera Nacionan Uni. Algo cu gobierno anterior a haci tambe ora cu no a haya otro cu Hulanda ora cu e ultimo aki a duna Aruba un aanwijzing pa incumplimento di e presupuesto na 2014.