Banco Central di Aruba a revela e placa di papel nobo

Posted on 05/17/2019 3:38 pm AST | Updated on 05/17/2019 3:40 pm AST

ORANJESTAD – Despues di un proceso cu a dura 7 aña, Banco Central di aruba (BCA) durante un evento special diabierna mainta, a revela e  placa di papel nobo pa 2019. Tur e denominacionan ta cambia, incluyendo esun popular, esta e dori (100 florin) cu awor ta bira un imagen di un yuwana. E tabata un proceso largo, rigoroso, pero cu na final ora cu el a keda revela, a keda gusta pa tur esnan presente. Sigur pa e diseño hopi colorido, lagando casi nada di espacio blanco, y tambe e hecho cu a usa un artista local tambe a keda gusta. Loke no a keda gusta despues, ta e hecho cu ta usando e idioma di Hulandes, envez di Papiamento. Esnan cu ta envolvi cu e idioma, tabata lihe pa critica e aspecto aki riba rednan social. 

INSTRUCCION PA DISEÑO

BCA a pone algun condicion estricto pa tene cuenta cune, manera 1, sigura contra falsificacion, visualmente atractivo y colorido, facil pa reconoce, incluso pa personanan cu impedimento visual, traha di material duradero, usando e technologia mas avansa den elementonan di seguridad y tecnica di produccion y un costo razonabel. Cada placa di papel mester a ilustra un detaye of tema representando Bida na Aruba, pasado, presente y futuro incluyendo entre otro awa, industria, cultura, flora y fauna. 

COMPETENCIA

Envez di acudi na un agencia professional di diseño, a organisa un competencia di diseño, unda cu a traha un lista cortico di artistanan local y invita nan pa participa. A scohe miembronan di hurado, y a tene tres ronda di competencia di diseño. Finalmente e artista local Nigel Matthew a gana e competencia. E ultimo biaha cu a haci e cambio, e artista Evelino Fingal a gana y su diseño a wordo usa. 

PROCESO PA DESTAHO PA IMPRENTA

A sigui e proceso pa imprenta e placa di papel. Mester a tuma decision riba e compania cu lo a haya e trabou. A haci un preparacion di e Request For Proposal (RFP), cu ayudo di Banco Central di Hulanda y PNO Global. Finalmente e compania CRANE a haya e trabou, y ta e compania encarga cu imprenta di e dollar Mericano tambe. 

PROCESO DI PRODUCCION

Tabatin tambe e produccion e ora di e papel pa e placa y e marca di awa, diseño detaya digital ditur 5 denominacion (10, 25, 50, 100, 200), control y aprobacion di e ‘proof prints’, y finalmente inspeccion, aprobacion y transporte di e serie di 2019 di placa di papel nobo. 

CAMBIO DI DENOMINACION

A dicidi cu debi cu e no ta wordo usa hopi, pa elimina e denominacion di papel di 500 florin y a cambia esaki pa 200 florin. Pa a haci esaki mester a cambia e ley ‘regeling geldstelsel’ den Parlamento, y bin cu un otorgacion di meldplicht na BCA, y tambe mester a cambia e ley di combati labamento di placa y financiamento di terorismo. 

EMISION

E emission ta un parti importante unda cu a cuminsa un campaña intensivo di informa publico riba e emicion di e serie na momento cu Parlamento a cambia e ley. A saca un comunicado di prensa unda cu a anuncia e cambio di placa. A cuminsa campaña di teasers den media, y esaki ainda lo continua pa e periodo nos dilanti. 

  • Powered by SETAR