- AZV: Otro luna tin traspaso automatico di clientenan di dokter Vink pa HOED Piedra Plat
- SETAR a tene su Avigilon ALTA Launch Event cu enfoke riba e futuro di seguridad
- Grupo grandi di ex studiante tin problema pa paga nan Duo lening bek
- CBS: Bestaansminimum a subi atrobe na Aruba debi na aumento di gasto di cuminda
- Figaroa: Proximo gobierno mester consisti di solamente vakministers
Arubiano acusa di a mata su yiu, por haya pena di morto na Merca
OKALOOSA COUNTY – E Arubiano Frederick F. Sr por haya e pena di morto si ta pa Fiscal di Florida na Merca. E cargo contra dje ta asesinato, y ta e caso di e homber cu ta acusa di a hinca su yiu di tres aña mata e aña aki. Ta na luna di Maart nan a presenta e cargonan contra F. Fiscal mientrastanto a informa cu durante e caso, nan lo pidi e pena di morto pa e homber. Ta keda na un hurado y huez si e sentencia ey ta bira enberdad e caso.
E CASO
Dos luna pasa un inspector federal di post Mericano a haci un peticion pa por haya permiso pa check e contenido di un paki manda pa e Arubiano sospechoso, pa su yiu muher na Aruba. Segun e peticion den corte, e servicio federal postal ta kere cu e pakete por contene un cellular usa pa Franken, prome cu e lo a mata su yiu homber, y despues hinca su mes.
F. a keda deteni y acusa cu homicidio dia 23 di maart na Fort Walton Beach Medical Center, unda cu e tabata ricibi tratamento pa su heridanan propina pa su mes.
Segun e peticion pa wak e paki, autoridad ta preocupa cu metemento di posibel evidencia. Aparentemente e pareha tabata den un discussion te cu maart 15, 2019, e dia di e incidente, te cu 3 pm. Ultimo cu nan lo a papia cu otro tabata 3:10pm riba 15 di maart, na cua punto e casa (Darrelly F.) a bisa investigadornan cu el a tende su casa discuti algo di 200 dollar. E suma ta e balor di e seguro pa e pakete manda, segun un recibo haya durante e buskeda na e cas di F.
E documento ta papia di dos mensahe di texto, aparentemente manda pa F. pa su casa. E mensahenan manda entre 6:20am y 6:45am rba Maart 15, ta bisa ‘ bo lo wak awe tardi’. Pero e texto no ta un citado exacto, ya cu e ta den e idioma Papiamento. E casa Darrelly a traduci e mensahe aki pa autoridadnan. E cellular di F. no a wordo localisa, ni riba e persona, su cas of su auto. Riba e lista di contenido di e pakete manda pa Aruba, tin poni e.o. cellular. Pues esey ta un parti crucial di e evidencia di e caso.
Tin hopi incertidumbre riba supuesto atake di Israël riba Iran marduga
TEHERAN – Mientras cu tin informacion cu Israël a ataca Iran durante diabierna marduga, tur dos pais ta keto riba e atake aki. Iran ta bisa cu e la saca algun drone di Israël for di shelo, pero ta desmenti cu tabatin un atake di raket. Algo cu prensa Mericano si ta raporta. Iran no ta yama Israël como e culpable tampoco, dus tin hopi incertidumbre riba e atake aki. Recientemente Iran a haci un atake specifico y calcula riba Israël, y despues Israël a keda keto. Esaki ta un noticia den proceso.
Cantidad grandi di Dominicano bibando illegal na.Aruba a bolbe nan pais boluntariamente
ORANJESTAD/SANTO DOMINGO – Un cantidad grandi di Dominicano bibando ‘ilegamente’ na Aruba, a bolbe nan pais boluntariamente. Asina e portal El Nacional a raporta diamars. Na tur, ta trata di mas di 4.300 dominicano cu tabata residencia e.o. na Aruba, cu a bolbe nan pais bek den e ultimo 15 lunanan. E portal ta cita datonan ‘estadistica’ obteni di e aeropuerto di Las Americas. Fuera di Aruba, nan tabata ubica na e.o. Panamaá, Venezuela, Colombia, Mexico, Argentina, Chile, Honduras, Corsou, Spaña, Francia, Italia y Alemania. “Mas di 60% di e Dominicanonan aki ta muhernan”, e portal ta sigui bisa. E Dominicanonan cu a bolbe tabata haci trabou domestico, restaurant, beautysalon, y den centronan nocturno. “Nan tabata biba ilegalmente, soportando e persecucion di autoridad”. E hombernan tabata traha den agricultura, construccion, panaderia y otro tipo di negoshi”. Hopi di nan tabata biba entre 5 pa 6 aña bibando illegal, y a dicidi di bolbe boluntariamente. Pa nan por a bolbe, mester a haya sosten economico di nan famia na Republica Dominicano, y incluso e consuladonan cu ta representa e crioyonan na e paisnan aki” e portal ta sigui bisa. Un dato interesante ta bisa cu mas di 200 Dominicano a bolbe e aki caba (2024) y mayoria tabata di Panama, Venezuela y Corsou. NOTA: Noticiacla independientemente no por a verifica e informacion aki adkeri di e portal en cuestion.
Maduro: Venezuela ta sigui cu of sin licensia Mericano pa alivia sancion petrolero
CARACAS – Presidente Venezolano Nicolas Maduro a sigura dialuna cu Venezuela ta sigui su marcha economico cu of sin licensia Mericano cu ta aproba un alivio di sanccion riba e petroleo Venezolano. Dialuna gobierno Mericano a dicidi cu no ta extende e validez di e alivio cu ta vence diahuebs awor. “Nos ta sigui, cu of sin licencia, nos no t aun colonia Mericano. Nada lo para nos, señores Mericano” e presidente a bisa. Segun Maduro, presidente Mericano Biden ta sigui chantagea cu menasa cu e ta bay kita e licensia cu e la permiti na Caracas pa comercialisa sin problema, e crudo den e ultimo 6 luna.
Flambeu olumpico ta cendi!:E marcha largo pa Paris a cuminsa!
OLIMPIA – E flambeu olimpico pa e proximo weganan na Paris den zomer, a wordo cendi. Esaki a sosode diamars mainta di forma tradicional den e ciudad bieu Olympia na Grecia, unda cu 776 prome cu Cristo, e prome weganan olimpico a tuma lugar. Durante e ultimo edicion, no tabatin publico debi na e menasa di Covid. E biaha aki esey tabata diferente.
Caso penal historico contra ex presidente Trump a inicia na Merca
NEW YORK – Seleccion di hurado pa e caso penal contra ex presidente Mericano Donald Trump a cuminsa dialuna mainta na New York. Esaki ta bira un caso historico siendo e prome caso penal contra un ex presidente di Merca. Trump ta den corte pa pagamento di placa na un actriz di pelicula porno, pa e keda keto. Cu esaki e kier a evita un escandalo sexual na caminda pa e eleccion presidencial di 2016 cu e la gana. Tin un total di 34 keho contra Trump, cu si wordo haya culpable, por haya 4 aña di castigo di prizon.
Portal ya ta propaga cu matrimonio di pareha di mesun sexo na Aruba ta legal
ORANJESTAD – Mientras cu na Aruba ta pendiente pa e sentencia di Corte di Casacion riba matrimonio di mesun sexo, y e hecho cu otro luna Parlamento ta trata e ley mes, ya tin portalnan internacional cu ta propaga cu matrimonio di mesun sexo ta legal na Aruba. Noticiacla a wordo informa pa personanan conoci cu e tema riba e noticia di e portal aki, riba e informacion aki, cu ta confuso y por crea malinformacion pa nos isla. Ademas, e notificacion ta sali di un raportahe di un portal conoci den e mundo aki di LGBTQ+, unda cu Aruba ta figura den e top 9 destinacionan den Caribe mas pro LGBTQ+. Ta den e raportahe aki, ta informa eroneamente cu matrimonio di pareha di mesun sexo ta legal. Ademas tin e biblioteca ‘cybernetico’ Wikipedia, tambe ta raporta cu desde 2022, matrimonio di mesun sexo ta legal na Aruba.
Follow NoticiaCla
