Minister a manda sera scol

ORANJESTAD - Minister di enseñansa Michelle Hooyboer a manda sera Reina Beatrix School pa dialuna. Esaki te ora cu trabounan wordo haci pa drecha e problemanan cu tin na e scol. Tabata diabierna atardi cu Reina Beatrix School a informa e minister concerni di algun desaroyo fastioso, di cual ta rekeri atencion y accion inmediato. Mesora a activa diferente departamento cu for di den fin di siman ta atendiendo e puntonan di mas urgente. Pa e motibo aki a duna instruccion pa cera e scol dialuna te ora haya un miho bista di e situacion y pa garantisa siguridad di alumnonan y maestronan na scol.

“E siguridad y salud di alumnonan y maestronan ta mi prioridad y tur decision cu wordo tuma lo tene esaki den consideracion” asina Minister Michelle Hooyboer-Winklaar a bisa. Tin varios punto di urgencia pa cual Departamento di Enseñansa y DOW ta trahando duro pa por soluciona esunnan mas urgente pa por continua cu dunamento di les bou di e circumstancianan aki.

Ta purba pa e trabounan por bay riba un velocidad mas lihe cu normal, pa por sigura cu scol no ta keda cera pa mucho dia, strobando e studiantenan di por haya les. Sinembargo, tanto e docentenan tin un lista largo di asuntonan cu ta rekeri atencion na infrastructura di e scol, pa nan por duna les den un ambiente mas sigur.