Oduber: Evaluacion di ATA riba Caribbean Sea Jazz a sali malo

ORANJESTAD – “ATA su evaluacion riba e evento aki a sali masha malo pa varios aña caba”. Esey tabata e prome reaccion di minister di turismo Dangui Oduber riba e noticia di cancelacion di e di 13 edicion di Caribbean Sea Jazz Festival, manera cu NoticiaCla a confirma diaranson mainta. E CEO di ATA (oficina di turismo di Aruba), Ronella Tjin-Asjoe tabata mas ‘diplomatico. ‘Lamentablemente (e evento) no a cumpli cu e obhetivo stipula, sigur considerando e cantidad di sponsorship” e CEO a bisa NoticiaCla.  E organizador Erik Jan Eman a sigura e portal aki cu otro aña nan lo kier ta bek. 

POLITICA ENVOLVI?

Un di e rumornan cu tabata core ta cu esaki ta un asunto ‘politico’, pasobra e organizador ta carga e fam Eman. E mandatario a sigura cu esaki no ta e caso. “ Tur decision cu tuma ta basa riba evaluacion cu ATA ta haci pa cu cada evento pa wak si e evento ta “meet the targets” Oduber a sigui bisa. Riba e pregunta di e portal di cu ‘ no por considere un decision politico a base di pasado relacion politico’, Oduber tabata cortico pero directo.“ Na ningun momento!” e mandatario a bisa. 

ATA

Pa loke ta ATA mes, su reaccion pa e portal aki tabata mas ‘diplomatico’, menos directo cu e mandatario. E CEO a admiti cu no ta cos di aña pasa, sino cu ta varios aña caba nan ta struggle cu e organisacion di e evento, pa nan por ‘cumpli cu e obhetivo stipula’, y esey ta pa atrae un cierto cantidad di turista pa Aruba pa medio di e evento. Segun Tjin-Asjoe a te hasta aumenta e sponsorship pa wak si por logra esaki pero lamentablemente esey no tabata e caso. A mustra cu na 2014 e suma cu ATA tabata sponsor tabata 200 mil dollar y a aumenta esaki gradualmente y na 2017 y 2018 esaki a bira 360 mil dollar pa e evento. “Na varios occasion a delibera, kico por haci, y sip or haci ahustacion na e evento. Entre nan pa eleva e evento. A propone na e organizador pa cambia e concepto y haci esaki uno di multiple evento cultural, y haci esaki mas frecuente, mas chikito manera ‘Korte Weg, of e Food Truck festival. 

ELOGIO PA ORGANISACION

Di otro banda, Tjin-Asjoe tabatin palabra di elogio pa e organizadornan, a considera cu nan ta traha ‘netjes’, ta un ‘organisacion solido’, y cu mester ‘duna Cesar loke ta di Cesar’. E evento riba su mes tabata bon organisa, y ta gradecido pa loke e evento a haci pa Aruba. Solamente cu no a logra e meta stipula. Esey ta, trece un cierto cantidad di turista. Den e caso aki a compronde cu pa e cantidad di placa cu ATA tabata hinca aden, mester a trece por lo menos 1500 turista Aruba. Y riba esey e organisacion a keda ‘cortico’, unda cu a trece 1100 so. Tjin-Asjoe ta spera cu nan por bin cu algo diferente, den e format cu el a sugeri caba na nan.