Caribbean Sea Jazz Festival a keda cancela pa e aña aki

ORANJESTAD – E di 13 edicion di Caribbean Sea Jazz Festival no ta sigui e aña aki. Despues di varios rumor circulando ultimo dianan, e organisador Erik Jan Eman a confirma e noticia lamentabel pa NoticiaCla diaranson mainta. Motibo segun Eman, ta cu oficina di turismo di Aruba (ATA) no ta considera cu e festival ta atrae suficiente turismo. Como tal a opta pa no sigui cu e patrocinio e aña aki. Segun Eman, e target tabata pa atrae por lo menos 1500 turista pa e evento, pero a logra trece ‘solamente’ 1100, pues no a cumpli cu e rekisito cu ATA a pone pa por hustifica un patrocinio.

BALOR DI PROMOCION

Di otro banda, segun Eman, e balor di promocion (media) tabata hopi mas halto cu a keda stipula den e contracto. Manera ta conoci pa por haya patrocinio di ATA, tin un lista di condicion mara na dje. E hecho cu ta cancela e festival aki ta hopi di lamenta, mirando cu despues di Soul Beach Festival, esaki tabata e festival cu mas aña a keda organisa. Y loke ta hacie aun ma special, ta cu esaki tabata organisa cu talento completamente local. Pues esaki ta dune un toke special. 

REACCION

E reaccionan tabata hopi, desde cu e rumornan a circula y particularmente di artistanan local, cu tabata haya un bentana asina via di e festival, pa desplega nan talento tur aña durante e festival aki. Tambe e localidad di e evento tabata uno hopi gusta, (Renaissance Festival Area) y a crea un ambiente hopi unico y gusta. No ta conoci si e festival lo por sigui otro aña. Loke cu Noticiacla a compronde di ATA, ta cu nan ta trahando cu e organisacion pa wak si por crea un otro evento cu por fit den e margen di evento local di e isla. Eman a splica NoticiaCla, cu e ta spera cu otro aña si nan por sigui cu e festival aki. Nota: Potret cortesia CSJF.