SAC a pospone su evento di anochi di diamars awor

ORANJESTAD – Stichting Arubaanse Carnaval (SAC) lo presenta un programa adapta pa inicio di carnaval diamars awor, enves di e programa cu tabata programa originalmente. Entre e cambio, a dicidi di pospone e celebracion di anochi te ‘proximo aviso’. “Nos a haci esaki pendiente e caso (contra gobierno) cu tin dia 19 (di november) awor”, presidente di SAC, Tecla Kelly a bisa NoticiaCla.com diadomingo anochi. Tabata algun ora despues cu e invitacion oficial a sali pa e evento di 11-11, cu a bira oficial cu e programa tabata uno adapta. Hunto cu e cambio, a dicidi tambe cu e ‘jingle oficial’ y e programa di carnaval lo keda presenta despues di dia 19 di november. Esaki no kier men cu nan no ta cla, sino cu nan tey, pero ta wanta un rato cu nan.

E intencion tabata pa un evento tanto mainta, cu normalmente ta cuminsa 10’or di mainta y ta haya su parti oficial 11’or di mainta, 11 minuut y 11 seconde. E biaha aki, a opta pa haci tene un recepcion chikito, duna un splicacion di e situacion, y haci e apertura riba e ora stipula. Fuera di esey, lo no tin nada mucho mas. E otro parti, un fiesta mas grandi parti anochi, dilanti di Sport Centrum na Santa Cruz, ta keda posponi. “Nos no a cancela, sino pospone” Kelly a sigura NoticiaCla.com.

Mes momento a confirma cu enberdad algun sponsor grandi a para, mirando cu ‘tin un incertidumbre’ grandi entre comerciantenan riba kico, y mas importante, ken ta organisa e carnaval. Saliendo di e punto cu tin un caso di LAR pendiente, unda cu cos por bolbe cambia, tin un incertidumbre no obstante e hecho cu gobierno a otorga e permiso pa organisa carnaval na e otro fundacion esta SMAC (Stichting Maneho di Aruba su Carnaval).

Manera ta conoci, e caso di LAR cu SAC a entama diahuebs contra gobierno di Aruba (lesa minister di asuntonan general Mike Eman y minister di cultura Otmar Oduber) , ta tuma lugar diaranson 19 di november proximo. Diabierna, corte a notifica abogado nan di tanto SAC como gobierno di Aruba riba e fecha y cu e caso ta tuma lugar pa 8:30am. E intencion di SAC ta pa pidi hues pa para tur futuro permiso di wordo otorga na cualkier otro instancia cu no ta SAC. E argumento ta e.o. cu SAC como organisado di carnaval pa e ultimo 60 aña, a demostra cu nan ta esun cu tin e derecho, y cu no tin ningun motibo valido pa no duna SAC e permiso atrobe. Ademas, e hecho cu a duna SAC un permiso pa e apertura di carnaval , esta 11-11, ta pone cu ta logico cu esun cu habri carnaval, mester haya e permiso di carnaval completo. (lesa e carta di Corte aki)