Corte: Ta aplica ley pa caso di asilo conforme tratado

ORANJESTAD – E hecho cu Aruba den pasado a firma e tratado pa e.o. asuntonan di asilo, awe ta persigui nos isla y tin gobierno e.o. cu poco dolor di cabez. Asina huez Jaap Sap a splica e situacion brevemente di asilo y stranhero na Aruba. Mientras cu ta planeando un conferencia di prensa pronto riba e tema aki specifico pa duna e tema su atencion debido, el a duna un bista breve di kico ta pasando riba e tereno aki, cu ta encera nan tambe. Ultimo tempo ta hayando critica cu hueznan p.e. ta laga stranheronan bay, sino mas. Pero a splica kico nan tarea ta riba e caso aki. 

TRATADO CREANDO PESO AWOR 

 Dialuna durante un conferencia di corte di husticia di Aruba, huez Jaap Sap a confirma cu e consecuencia di tratado por ta no tabata bon conoci y awe e ta cobra su peso. Segun Sap, nan trabou como huez ta meramente pa tene tur hende na e regla y tratadonan ora cu trata e casonan di e.o. asilo politico y refugiado. Y consecuentemente tin momento cu esaki por hinca e pais den un situacion inoportuno. 

AUMENTO DI CASO

Segun Sap, den pasado e casonan cu a bin dilanti di stranhero/asilo no tabata nada hopi y nan tabata manehable. Awe, e situacion a aumenta di tal forma cu mester a informa gobierno di e maneho actual y con e leynan ta hinca den otro cu mester wordo ateni na dje den e casonan aki. Y aki ta unda cu ta parse cu no tur hende ta na altura of a compronde e embergadura di e tratadonan y e leynan cu ta mara na esaki. 

DERECHO Y DEBER

Sap a sigui mustra cu tur hende mester ta na altura di kico nan derecho y deber ta, tanto e stranheronan envolvi, como gobierno. “Y mi ta conciente cu dado momento ora cu aplica e regla y ley segun tratado, e pais ta haya su mes den un situacion no mucho oportuno” Sap a bisa. Pero ley ta keda ley y nan tey simplemente pa aplica esaki manera cu e ta prescribi. E tratadonan segun Sap ta netamente un proteccion contra actuacion di gobierno (si esaki ta uno incorecto).