Angela: No core skop Corte pa un sentencia sin sa e motivacion

ORANJESTAD – Ora cu tin un sentencia den p.e. un caso di abuso, y un huez declara un sospechoso liber, lesa e sentencia prome, y check e motivacion di e sentencia prome cu cuminsa skop contra corte.  Esaki ta e peticion y mensahe di huez Debby Angela dialuna durante un conferencia di prensa. E conferencia tabata pa presenta e relato annual di corte pa 2018. A bin e topico tambe di keho riba sentencia di huez, pa cual Angela a opta pa ‘en corto’, duna su splicacion. 

PRUEBA

Manera ya informa, Angela a mustra cu sin prueba, un huez no por sentencia un sospechoso. Ora cu tin un prueba so, ta mescos cu no tin prueba y como tal mester di por lo menos un ‘steunbewijs’, esta un prueba di sosten, pa yuda huez aplica e ley y duna e sentencia corespondiente.  Manera e dicho Hulandes ta bisa ‘één bewijs is géén bewijs’. Ademas huez Jaap Sap, encarga cu e conferencia, a sigui añadi cu un huez no ta bay riba un acusacion, sino riba prueba. Pues no ta pasobra un persona ta acusa un hende, cu esey ta suficiente pa e huez actua y sentencia. Segun Sap, pa por sentencia un persona acusa di algo, mester tin suficiente prueba convincente cu por duna e huez e instrumento pa usa ley y aplica esaki corespondientemente.  Hopi biaha ta facil sinta na banda y tin un opinion, segun Sap, pero unabez cu un persona tin tur e informacion, por determina si enberdad por sentencia un persona, sin cu tin suficiente prueba. 

EHEMPEL

Angela a mustra cu un ehempel, kico por wordo usa como un prueba di sosten. Si un hende bisa cu el a wordo abusa pa un otro persona, ora cu nan dos so tabata den e lugar, esey no ta suficiente. Pero si tin un hende cu tabata pafor di e lugar y wak e victima sali pafor di e sitio gritando y ta yora y ta bisa cu el a wordo acusa, esey por ta un prueba di sosten cu por usa p.e. Asina tin mas forma con por tin pruebanan di sosten cu un persona por usa pa fortifica su caso. Y sino e ta bira un caso dificil pa presenta y prueba, cu consecuencia cu por te hasta declara e sospechoso liber.