SMAC a introduci su mes oficialmente anunciando nan evento pa 11-11

ORANJESTAD – Stichting Maneho di Aruba su Carnaval (SMAC), e fundacion nobo cu meta pa organisa actividadnan carnavalezco,  a presenta su mes oficialmente diabierna atardi na publico. No cu mucho informacion ainda, pero si nan a anuncia mesora nan prome evento di carnaval titula ‘The Legends’. E presidente recien eligi Randy Thiel, y e vocero di e grupo Lio Dorothaal a introduci e fundacion y e miembronan. E festival aki ,-organisa na Carnaval Village na San Nicolas-, mester bira e ‘apertura’ di temporada di carnaval 2015, y ta un festival pa duna homenahe na 3 instancia carnavalesco. Fuera di esey a priminti cu lo presenta e programa completo ‘oficial’ diamars tambe. Mes momento a desmenti cu e programa cu lo a 'leak', ta e programa oficial. E ta uno 'tentativo', pero cu diamars lo por mira e programa final. (Mira e programa tentativo cu a leak den media) Di otro banda, tur otro asunto ta keda pendiente, manera posibel casonan cu por termina den Corte, aunke nan no kier a indica specificamente kico nan plan ta riba esaki. De hecho, hopi asunto no a haya contesta diabierna pero a wordo informa cu ta ‘trahando ariba ainda’ y ta keda ainda ‘como sorpresa’ pa diamars.

Entre e loke si a wordo divulga diabierna ta, cu lo tuma lugar diamars atardi 6pm awor, ta e presentacion di e jingle di carnaval, programa di carnaval, y homenahe na un carnavalista, musico y un lider di grupo. “Nan ta esnan cu ta yuda engrandece nos carnaval” Dorothaal a bisa. Bandnan confirma ta The Failures, Buleria y Le Groove.

Mientras cu a priminti cambio den programacion, pa evita e asina yama ‘copy paste’ cu lo tabata tuma lugar antes, lo mantene e programa cu no mucho cambio drastico, segun Dorothaal a bisa. Mes momento SMAC su vocero a sigura cu lo tin un calypso y roadmarch contest pasobra nan ta considera ‘musica como un parti integral di carnaval’.