Union Europeo ta kita Aruba di lista preto e siman aki

BRUSELAS – Union Europeo lo kita Aruba di e lista preto di pais cu ta considera un paraiso fiscal. Hunto cu Aruba, lo kita Bermuda y Barbados y esaki lo sosode durante un reunion di e ministernan di finanzas Europeo diabierna awor, 17 di mei. Asina e portal Bloomberg ta raporta. E unico informacion di parti di gobierno di Aruba (te cu awor) ta un mensahe riba pagina di Facebook di prome minister Evelyn Wever Croes, ta ‘Habri siman cu un bon noticia asina!. Oficialmente gobierno no a reacciona ainda riba e noticia aki. 

MOTIBO

E motibo segun e portal cu Union Europeo ta cu lo elimina e paisnan menciona di e lista, paspobra ‘nan ta cambiando nan leynan fiscal’. E ley na Aruba mester a wordo pasa masha tempo, pero segun gobierno, falta di personal a pone cu no por a keda cla cu esaki ainda, y como tal e ‘deadline’ pa informa UE a vence, cu e consecuencia conoci. Tambe a bisa cu tabatin otro prioridadnan e momento ey cu mester a atende prome, mirando e situacion. Pues tabata conciente di e ‘peliger’ di e lista preto, pero ta algo cu por wordo remedia door di pasa e ley. Algo cu a sosode recientemente tambe. 

CRITICA

Di otro banda, un grupo di fiscalista a protesta publicamente riba e tema, bisando cu no a check cu nan prome cu a pasa e ley y cu esaki ta perhudica Aruba di un forma grandi, esta pasa e ley den e forma cu esaki a pasa, pa complace Union Europeo.