Gobernador Boekhoudt a presencia saludo ceremonial pa bapor Zr.Ms. Groningen

ORANJESTAD – Diabierna mainta Gobernador di Aruba Alfonso Boekhoudt a presencia e saludo ceremonial di Zr. Ms Groningen. Despues cu e bapor a mara na waf, e comandante C KLTZ Hugo Sinke a efectua un bishita official cerca Gobernador. E saludo ceremonial a tuma lugar den Paardenbaai dilanti Cas Ceremonial di Gobernador. Ora cu un bapor di Marina Real Hulandes yega Aruba pa prome biaha, esaki ta bay cu un saludo ceremonial. E bapor ta lansa 21 tiro, cu ta wordo contesta for di tera cu 21 tiro. E bapor, un asina yama oceangoing patrol vessel (OPV), ta keda pa 2 aña den Caribe y lo wordo usa pa intercepta e.o. traficantenan di droga y sostene Warda Costa. Tambe e por asisti cu un calamidad. E tin dos boto FRISC, un helicopter NH90, y un asina yama boarding team.