Structura di edificio a dificulta trabou pa contene candela marduga

ORANJESTAD – E structura di e edificio den Guttebergstraat cu a pega candela diabierna marduga, a stroba bomberonan di paga e candela grandi mas lihe. E officier van dienst na turno, Roy Kock, a splica NoticiaCla.com diabierna mainta cu no obstante esey, bomberonan a sa di haci nan trabou. Na tur, dos establecimento, - La Bodega y Popular Agencies-, a bay completamente perdi mientras cu 4 otro lugar, incluyendo Pastechi House a haya daño considerabel di awa y huma. Segun Kock, e causa di candela no ta determina, pero tin indicacion cu e lo a cuminsa den un skina di e edificio unda cu tabatin algo pa haci cuminda, manera un stoof. “Pero esey no kier men cu esey a ocasiona e candela” Kock a sigui bisa.

Tabata diabierna mey anochi cu bomberonan a haya e melding di e candela grandi, y a acudi mesora. “Parti paden tabata full na candela” Kock a bisa, ora cu nan a yega. Pero e problema, tabata e structura paden, cu a dificulta nan trabou. “Pa bo por drenta e lugar, tin dos porta di hero” Kock a splica. Mester a tuma 30 minuut pa corta e porta, y a topa otro porta. “Durante cu tabata corta e porta y tabata warda pa por a drenta, e candela a haya chens pa subi y drenta den otro lugarnan” Kock a bisa. Esey a pone cu pa ora cu nan a drenta, no por a haci mucho mas. Di otro banda, Kock ta bisa cu si no tabatin porta di hero, mucho mas toch, nan lo no por a haci.

E problema pues ta uno cu bomberonan ta confrontando cune hopi. Hende ta renoba e edificio ‘riba renobacion’. Pues nan no ta kita e dak renoba, pa renoba atrobe, sino ta opta pa laga e ‘ex dak’ y renoba riba dje. Esey ta pone cu dado momento bo ta haya tres nivel di plafond, dak etc. Esey den caso di p.e. un candela, ta dificulta e trabou di bombero, segun Kock a splica NoticiaCla.com. E potret principal ta momento cu personal di bombero ta atende cu esnan di e establecimento La Bodega, cu a keda completamente destrui paden. E otro potretnan ta duna un impresion di e daño cu e otro establecimentonan a ricibi.