Tjon: Ley di LAFT lo no conta cu aprobacion di MEP

ORANJESTAD - Fin di luna di mei, Parlamento tin programa pa (porfin) trata e ley di LAFT cu ta autorisa e colegio di supervision financiero CAFT pa por supervisa e situacion financiero di Aruba.  NoticiaCla a raporta recientemente cu e ley nobo ta acomoda e.o. pa actual miembro di CAFT pa Hulanda, Henk Kamp. Esaki riba su mes ta interesante si tene na cuenta cu den fraccion di MEP tin un miembro cu ta contra Kamp. Mes momento e cambio di ley ta duna Aruba tambe e chens pa haya un miembro cu por ta un ex politico. Pero pa loke ta e resto di contenido di e ley, esaki ta empugna cu nos estado di derecho segun lider di fraccion di partido MEP den Parlamento Rocco Tjon. Asina e ta bisa riba su pagina di Facebook diahuebs. Manera ta conoci, e ta recorda cu Parlamento di Aruba a ricibi e ley di supervision financiero temporal, e asina yana LAFT. Segun Tjon, e ley aki cual a wordo traha de facto door di Hulanda y sr. Knops, no lo conta cu aprobacion di Fraccion di MEP. Pa e simpel motibo cu e ta empugna cu nos estado di derecho.

PROCESO DI LAFT

Segun Tjon, den e nader rapport riba e conseho di "Raad van advies"  por tuma nota cu ta indica claramente cu e concepto inicial a wordo wanta atras, despues di "consulta" cu sr. Knops. “ Pa mi persona sigur e ta inacceptabel y condenabel cu sr. Knops y Hulanda kier bin actua contra nos estado di derecho y pretende di por mete tambe den e organo Parlamento door di nan exigencianan. Ta asina cu Parlamento di Aruba tin te dia 17 pa hasi pregunta riba e ley aki y e ley lo ser trata dia 27 di mei” Tjon ta sigui bisa.

CONSEHO DI RAAD VAN ADVIES

Tjon ta sigui bisa cu ‘corectamente "Raad van Advies" ta bolbe señala cu e ley aki cu Hulanda y sr. Knops kier impone riba Aruba ta empugna cu nos constitucion y cu Statuut di Reino’. “E ley di sr. Knops ta mina e derecho di Parlamento, esta e "budget recht" y esaki ta algo cu nos como pais democratico hamas por acepta. Te unda mi persona sa, sr. Knops y partido CDA no a participa na ningun eleccion aki na Aruba” e lider di fraccion di e partido geel ta sigui bisa. 

CONCLUSION

“ Dia 27 di mei e ley aki lo wordo trata y fraccion di MEP lo percura pa respet pa nos democracia wordo restaura y tambe recupera nos autonomia financiero”. Asina Tjon ta sigui bisa. “Den e proceso rumbo pa trata e ley lo mi percura pa informa pueblo debidamente riba e contenido di e ley di sr. Knops y splica locual de facto sr. Knops kier impone riba Aruba”. Tjon a sigui pa invita pueblo di Aruba pa ‘dia 27 di mei presencia e reunion publico y ta testigo di con Aruba ta recupera su autonomia financiero bou Gabinete Wever-Croes. Autonomia cu Mike Eman a entrega na 2015’.