Comisarionan di Polis a presenta datonan di nan maneho

ORANJESTAD - Comisarionan di Polis a presenta datonan di nan maneho. Aña pasa a cuminsa un proceso nobo, unda cu e comisarionan encarga cu e diferente departamentonan di Cuerpo Policial ta presenta datonan tocante funcionamento, cumplimento cu meta, retonan y posibel solucionnan na un team di evaluacion. E team aki ta consisti di Minister di Husticia, Alto Comisario, Procurador General y Director di Departamento di Siguridad Nacional.

Recientemente Comisario Kock – Recherche, Comisario Gordon – Bijzondere Diensten, Comisario Hassell – Surveillance a tene nan presentacionnan. E comision ta evalua e funcionamento di e departamentonan basa riba e maneho cu a hiba e ultimo aña basa riba e punto di salida di e maneho di Gobierno, esun di Ministerio Publico y di Cuerpo Policial, Minister di Husticia mr. drs. Arthur Dowers a splica.

E team ta sumamente satisfecho cu e presentacionnan, cu a consisti di no solamente estadistica (cifranan), pero di metanan realisa, retonan, limitacionnan y e solucionnan cu ya e departamentonan mes a logra introduci y otro solucionnan pa cual nan tin mester di asistencia for di otro gremionan.

“Nan a mustra un disponibilidad, no solamente pa busca solucion, crea solucion, pero tambe a presenta den un forma sumamente habri e retonan cu nos ta wordo confronta cune. Mi ta sinti mi hopi mas trankil aworaki pa mira cu e organisacion ta bayendo na un nivel cu bo por bisa cu e ta un organisacion profesional, un organisacion cu por garantisa e siguridad di e pais,” Minister Dowers a conclui despues di e presentacion.