Examen final a cuminsa na Colegio Arubano pa 423 alumno

ORANJESTAD - E siman aki 300 alumno di HAVO y 123 alumno di VWO di Colegio Arubano a cuminsa cu e examen centralisa final por escrito, cu ta dura te cu 24 di mei. Despues di lunanan di preparacion intensivo y training, e meta final ta na bista.

Diamars ultimo a cuminsa cu e materia Geschiedenis. Despues di e examennan, e alumnonan di Colegio mester tin pasenshi te cu 12 di juni. Riba e fecha ey nan ta haya resultado si nan a gradua. Si esaki no ta e caso, tin posibilidad pa haci un herexamen. Riba 28 di juni lo ta conoci si esnan cu a haci herexamen, tambe cu diploma den man, por cuminsa cu vakantie.

E cantidad di Colegiano cu ta haci examen e aña aki ta mas hopi cu aña pasa. Tabata tin participacion di 280 alumno di HAVO y 101 alumno di VWO na e examen final. Finalmente 70 porciento a gradua pa HAVO y 68 porciento pa VWO.

E examen final cu e alumnonan ta haci na Colegio Arubano ta mescos pa e candidatonan di examen di HAVO y VWO na Hulanda. Cu e diploma e alumno tin acceso na un estudio na nivel di HBO of (cu e diploma di VWO) e por sigui un estudio universitario. Den practica e alumnonan di Colegio Arubano ta scoge pa bay studia na Hulanda, Estados Unidos, Canada of Colombia. E alumnonan di Colegio Arubano ta trahando nan examen. Pa mayoria esaki ta conclusion di nan periodo escolar. E examennan ta dura te cu 24 di mei. Riba 28 di juni ta haya sa cuanto e porcentahe di graduado ta pa HAVO y VWO.