Gobierno kier adapta LAFT pa e.o. acomoda Kamp den CAFT

ORANJESTAD – Gobierno ta parse di a cambia su postura pa cu candidatura di Henk Kamp como parti di e colegio di supervision financiero di Aruba, esta CAFT. Den e concepto di ley cu a keda presenta (porfin) diaranson 9 di mei 2019 na Parlamento, tin (fuera di e adaptacion di norma) un punto den e ‘memory van toelichting’, cu ta sugeri pa cambia e ‘regla cu un miembro di CAFT no por ta tabata riba lista politico den Reino Hulandes’. Un punto cu gobierno tabatin problema cune, particularmente un miembro di fraccion di partido MEP den gobierno. Di otro banda, cu e cambio aki (si e keda aproba) Aruba por beneficia grandemente tambe, pasobra e cambio lo conta pa tanto Aruba como Hulanda. Prome minister Evelyn Wever no a reacciona ainda pa NoticiaCla riba e cambio aki. No ta conoci tampoco kico e parlamentario Endy Croes ta pensa di esaki. 

PAKICO CAMBIO

Mientras cu NoticiaCla no a haya un reaccion official di gobierno pa cu e punto aki (a busca reaccion pero no a logra ainda), por a compronde cu esaki tin di haber cu si e cambio logra, e mester ta valido tambe pa Aruba. Esaki den sentido cu si acepta cu Kamp por keda como miembro, e ora Aruba tambe mester por tin un persona cu tabata riba lista politico, pa forma parti di CAFT. Esey ta habri caminda pa ex politiconan cu expertisio riba tereno financiero ingresa CAFT di parti di Aruba. Algo cu awor, segun e ley actual, no ta posibel, no obstante cu Hulanda si tin un ex politico formando parti di e colegio. NoticiaCla a compronde cu tabata fraccion di AVP e tempo ey den Parlamento durante gabinete anterior ta esun cu a entrega un amienda pa adapta e ley pa no laga un ex politico forma parti di e colegio, cual amienda a pasa tambe. De hecho, prome minister Evelyn Wever Croes mes a remarca pa e portal aki un tempo atras, cu nan (fraccion di AVP den parlamento e tempo ey) no tabata kier pa ‘un Nelson Oduber of un Nilo Swaen forma parti di CAFT’. 

KICO E POR NIFICA?

E hecho cu gobierno lo ta dispuesto pa haci e cambio awor, y cu ta habri posibilidad e ora (si Conseho di minister di Reino aproba esaki) pa Aruba tambe tin ex politico como miembro, ta un cambio sigur. Pasobra e ta permiti Kamp di continua como candidato, cu ta algo cu miembro di fraccion di partido MEP Endy Croes publicamente tabata contra. Esaki pasobra ‘pa ley’ Hulanda tabata viola e parti aki di e ley di LAFT. Hulanda pa medio di secretario di estado Raymond Knops den pasado a sigura NoticiaCla cu Aruba a aproba e candidatura di Kamp, y cu si tur partido ta di acuerdo, no mester tin problema. Aruba ta sigura cu nan a bay di acuerdo, bou protesta, pero cu nan no ta di acuerdo cu e candidatura. Kico tin tras di e cambio aki, no ta conoci, pero tin posibilidad cu Aruba lo ta dispuesto pa haya algo bek di Hulanda, si nan acepta e deal aki. Mester bisa cu, e cambio aki, si e keda aproba, tin mas beneficio pa Aruba, cu e tin pa Hulanda ya cu Aruba mester di tur experticio posibel den e colegio, cu tur respet pa e candidatonan cu a representa Aruba den pasado y presente. Cu Parlamento di Aruba ta bay di aceurdo cu esaki, no ta conoci, sigur no e fraccion di MEP. Por mira e concepto di ley y memory van toelichting AKI.