Ex director di Giro Bank Eric Garcia sentencia na 4 aña di prison

WILLEMSTAD  – Corte den prome instancia a sentencia ex director di Giro Bank Eric Garcia (78) na 4 aña di prison pa malversacion di 11 miyon dollar, falsificacion y labamento di placa. Ademas e mester paga e placa malversa, calcula na 19 miyon florin bek. Si e no haci esey, e ta haya 3 aña di prison aserca.  

E CASO 

Garcia, durante e tempo cu el a fungi como curator di e bancarota di Banco Maracaibo, mester a maneha e placa ey, pero a transferi esaki pa varios cuenta di banco internacional. E placa a wordo usa pa cumpra accion den e banco cu e tabata director. Esaki a sosode sin conocemento y aprobacion di e huez comisario di e bancarota di Banco Maracaibo. Segun Garcia, tabata trata di un fiansa, pero corte a wak e otro. E compania cu a haya e placa na Merca, no a considera esaki como un fiansa, sino e entrada di Garcia pa compra di accion. Ningun caminda ta haci mencion di un fiansa y no tin ningun acuerdo di fiansa, y despues di 9 aña, ainda no a paga nada bek. Ora cu a cuminsa cuestiona e  asunto, a presenta documentonan falso di banco. Como tal Garcia a perhudica e creditornan di Banco Maracaibo. Corte a duna Garcia un aña menos cu OM a pidi, y esaki parcialmente debi na e edad halto di Garcia. Entrante awe, Garcia mester a keda deteni, pendiente un eventual caso di apelacion.  Foto cortesia ronaldwederfoort.wordpress.com