Abogado Kock a retracta caso sumario di asilo politico

ORANJESTAD – E caso sumario entama pa abogado David Kock contra gobierno di Hulanda y Aruba referente asilo politico, a keda retracta. E abogado a confirma esaki pa NoticiaCla, incluyendo e splicacion. Segun Kock, ta e caso sumario so a keda retracta, pero e caso di profundidad (Bodem procedure) si ta sigui pero pa esey no tin fecha ainda 

REACCION GOBIERNO

Den un reaccion di gobierno, nan ta referi na e caso como uno “ cu a causa basta conmocion y hasta disgusto den nos comunidad, den cuadro di cierto demandanan di un grupo di persona cu a pidi asilo”. Segun gobierno, e caso ta uno peculiar ya cu a bin resulta cu ningun di e personanan no ta cumpli cu e exigencia di e tratado. Ta trata di personanan di cual a wordo constata cu nan ta ilegal riba Aruba y ta despues nan a core solicita pa asilo. Pues, gobierno ta sigui bisa,  tabata hopi curioso cu e personanan aki a dicidi di entama un caso di e indole ey. 

E CASO 

E caso pues, tabata poni pa tuma lugar diabierna proximo, unda cu tanto Aruba como Hulanda lo tabatin nan abogado, y lo a confronta abogado  Kock cu lo a defende e grupo di 6 ciudadanonan Venezolano. Segun Kock, nan tabata merece, conforme acuerdonan cera, cu tanten cu un persona ta warda asilo, e por traha, y biba na e isla di espera, cu den e caso aki ta Aruba. Esey ta inclui, trabou, hospedahe y seguro di  salud (AZV). Algo cu segun Kock, lo pisa riba e presupuesto di Aruba mas ainda. Como tal, e intencion ta pa no perhudica Aruba, sino pa pone Hulanda responsabel pa esaki, conforme acuerdonan cera.

REGLA CUENTA

Segun Kock na NoticiaCla, Hulanda mester ‘regla’ y financia e asunto aki di prove pa e grupo aki, mientras cu nan ta warda decision si nan ta haya asilo politico. Segun Kock, cu e caso aki, e kier pa Hulanda tuma responsabilidad y paga pa e proceso aki, enbez di Aruba. Mientrastanto tanto Aruba como Hulanda den un comunicado mutuo, a bisa caba cu nan lo a bringa esaki den corte diabierna proximo pa 2’or di atardi. Algo cu awor no ta tuma lugar mas. Lesa e carta cu ta retracta e caso AKI.