Maduro: Luna di juni lo no tin subida di prijs di gasoline

ORANJESTAD - Luna di juni lo no tin subida di prijs di gasoline. Asina minister encarga cu economia, Xiomara Maduro a sigura riba su pagina di Facebook, despues cu awe a keda publica cu prijs di gasoline entrante diaranson ta aumenta, y aumenta basta, compara cu luna pasa ora cu esaki no a subi, debi cu Refineria di Aruba a absorba e aumento. Mes momento e mandatario ta bisa cu prome cu nos tur cuminsa zundra, compronde cu si no a haci nada, prijs di gasoline lo a aumenta cu 30 cent.  Segun e mandatario, rond mundo prijs di producto pretrolero ta subi. A base di esaki, den luna di april y mei 2019, prijs di gasoline na Aruba lo mester a subi cu un total di 30,2 cent den dos luna di tempo. Den april e mester a subi cu 16,3 cent y den mei elo mester a subi cu 13,9 cent.

Segun e mandatario, na april a sali splica cu Gobierno a yega na un acuerdo cu RDA pa absorba e subida di prijs di gasoline cu 16,3 cent, mientrastanto cu ta bay haci uso di otro manera structural pa calcula prijs di producto petrolero. Pues a base di esaki den april no tabata tin subida di prijs di gasoline.

Pa locual ta mei a yega na e acuerdo pa tene e subida na 11,8 cent, cual ta un subida total pa cubri 3 luna, esta april, mei y juni. Esaki ta trece cune cu den mei prijs di gasoline lo conoce un subida di 11,8 cent, pero na juni atrobe no lo tin subida di prijs.

Den e proximo luna nan lo sigi haci uso di e manera nobo di calcula prijs di producto petrolero den cual ta haci uso di e prijs di compra di productonan petrolero riba mercado mundial den conbinacion cu e reserva di producto cu RDA ta almanece. Cu esaki ta spera di por yega na un prijs mas beneficioso pa Pueblo di Aruba.

“ Pues Gobierno di Aruba buscando un alivio pa Pueblo den e ultimo dos luna a yuda absorba 18,4 cent di aumento di gasoline y a pasa pa usa un otro manera pa calcula e prijs di benta di producto petrolero na Aruba. Si no a haci nada, den e dos luna nan aki Pueblo lo mester a conoce un subida barbaro di 30,2 cent. Gobierno no por evita cu prijs di producto petrolero ta subi rond di mundo, pero si ta haci locual ta na su alcanse pa yuda Pueblo di Aruba” Maduro a finalisa bisando.