RADEX BCMS lo check pa hendenan riba ‘watch list’ di Interpol

ORANJESTAD - Recientemente a wordo anuncia door di e Minister di Husticia cu RADEX BCMS (Border Control Management System), e sistema di maneho y control di frontera di Aruba, lo tin acceso na e watch list di Interpol via un interface. Esaki ta un noticia sumamente importante pa Aruba, siendo cu esaki ta yuda RADEX BCMS pa hasi background checks mas profundo na e personanan cu kier drenta frontera di Aruba. 

Actualmente RADEX BCMS ta revisa cada pasahero drentando Aruba via nan database cu tambe ta interface cu Korps Politie Aruba, Dimas y Censo. Awor cu RADEX BCMS lo tin acceso na e watch list di Interpol, RADEX BCMS por conduci e background check di un manera mas eficaz y profundo, cual lo yuda pa evita entrada di personanan cu por ehempel ta biahando cu passport horta of ta aparece riba lista di criminal.

Frank Baks, Director di Business Development di Gamma IT Solutions, ta comenta “Nos ta sumamente gradici y contento cu e cooperacion di parti di Interpol y di Ministerio di Husticia. Nos a logra cu RADEX BCMS lo tin acceso na e watch list di Interpol, cual ta un aspecto hopi positivo pa e siguridad di Aruba.”

Gamma IT Solutions, desaroyador local di RADEX BCMS, lo keda trese updates importante pa RADEX BCMS cu e proposito di por contribui pa tene e frontera di Aruba mas sigura.