Corte: No por tene stranheronan deteni mientras ta trata nan peticion di asilo

ORANJESTAD -  No por tene e stranheronan (Venezolano:red) deteni mas, cu intencion pa deporta nan, si nan (e Venezolanonan) haci un peticion pa asilo politico. Asina Corte a purba clarifica den un comunicado dialuna. Ta trata di e caso di e 9 Venezolanonan cu siman pasa a keda deteni ora cu nan a yega riba rif banda di refineria CITGO. Un situacion hopi confuso pa hopi, y cu por facilmente haya un interpretacion robez. Corte kier a splica cu no a djis duna ordo na gobierno pa suspende e detencion di e stranheronan y laga nan bay sin mas, pero cu tabatin un motibo pa esaki. Y ta sigui cu un splicacion tecnico di kico e situacion ta. 

ULTIMO FRASE

Sinembargo, na final di e comunicado di corte, den e ultimo frase, e comunicado mes ta bisa “El (e huez comisario:red) a dicidi solamente cu e stranheronan no por a keda deteni mas largo, cu intencion di wordo deporta, si nan ainda nan entrega un peticion di asilo”. 

PROBA

Segun Corte, den caso cu un stranhero keda deteni, cu e intencion pa wordo deporta, e huez comisario tin e deber legal pa proba si e stranhero a keda deteni legalmente y tambe si por expulse. Den e caso aki segun e comunicado, e Venezolanonan durante nan interogacion, a laga sa cu nan kier pidi asilo politico. Esey no por cerca un huez comisario sino na pais Aruba. Basa riba e tratado di refugiado, un stranhero no por wordo expulse si e pais no a dicidi ainda riba su peticion pa asilo. E frasenan aki di e tratado, cu a wordo acepta pa gobierno di Aruba, mester, manera tur otro caso legal, wordo aplica pa e huez cimisario. 

DECISION 

Den e caso aki e huez comisario a dicidi cu e detencion cu e intencion pa expulsa e stranheronan, ta legal, contal e stranheronan entrega un peticion official ainda cerca gobierno. No tabata conoci e momento ey si esey a sosode. Si esey a sosode, gobierno no tabatin e autoridad mas pa expulsa nan, prome cu a dicidi riba e asilo, y tene nan cera. Esaki di acuerdo cu e tratado. 

SPLICACION

Na final e comunicado ta bisa cu e huez comisario no a dicidi  cu gobierno di Aruba tabata obliga pa suspende e detencion di e stranheronan y laga nan den libertad. “El a djis dicidi cu e stranheronan no por a keda deteni cu intencion di keda expulse, si nan (e stranheronan) ainda pidi asilo politico”.