ORANJESTAD – E padrastro di e dos criaturanan Rishandroh y Eugene, Gabriel M. a haya aumento di castigo di prison den caso Speeltuin dialuna. Tres hues den Corte di Apelacion a aumenta e castigo di 15 aña cu 3 aña mas, esta 18 aña cu TBS. Cu esaki Hof a tene cuenta cu con horible e hechonan ta, e postura di e sospechoso durante e proceso. Tambe a keda comproba dos biaha homicidio. Cu esaki Hof a bay tres aña riba exigencia di OM. Den apelacion, OM a opta pa mantene mes exigencia cu den prome instancia, esta: 15 aña plus TBS.
E CASO
Tabata aña pasa na juli cu Corte a sentencia e padrastro di e dos criaturanan Rishandroh Anastacia y Eugene Frans na 15 aña di castigo incondicional di prizon combina cu TBS (Ter Beschikking Stelling) obligatorio despues cu e detenido sinta 10 aña di su castigo di prizon. Remarcable ta e hecho cu e padrastro a opta pa no ta presente den corte pa tende su sentencia y a informa corte un anochi prome. Y e famia tampoco tabata presente pa esaki. Tur esey, siendo cu net awe corte a haci tur preparacion pa por a ‘transmiti’ e sentencia den un otro sala si en caso tabatin e necesidad.
PADRASTRO
E padrastro tabata acusa di homicidio y severamente maltrata e criaturanan Rishandroh y Eugene. Banda di esey, e tabata acusa di a maltrata e co-sospechoso esta e mama di e dos criaturanan, y e hecho cu e la dera e curpa di Eugene. Ministerio Publico a conclui cu e hechonan presenta a keda proba pa cual a exigi un castigo di prizon di 15 aña y e medida di TBS (tratamento psychiatrico obligatorio) . Banda di esey, OM a pidi pa ehecuta un sentencia bieu di castigo di prison condicional.
COOPERACION
Huez a mustra cu e sospechoso a coopera cu e proceso penal y a haci declaracionnan di culpabilidad. Tambe e la mustra polis unda cu e la dera e curpa di Eugene. Su declaracionnan a keda confirma pa e co-sospechoso, testigo y raportahe di autopsia, cu ta splica e embergadura y tamaño di e lesionnan di e criatura(nan). Tambe huez a confirma cu a base di e pruebanan legal presenta, di e homicidio y e maltrato severo di ambos criatura, e maltrato di e co-sospechoso y e deramento di e curpa di Eugene.
EVALUACION
Huez tambe mester a considera cu den e caso aki mester a busca pa yega na un balansa riba e sufrimento cu e victimanan y famianan di un banda y di otro banda, evita cu un caso asina ta ripiti, pa cual mester provee e seguridad pa e comunidad.
TRATAMENTO DI ACUSADO
E sospechoso segun huez, a wordo trata pa tanto un psikiatra como un psicologo. Ambos a yega na e conclusion cu e sospechoso ta sufri di trastorno di personalidad, cu caracteristico cla psicopatico. Tambe e sospechoso ta sufri di un leve caso di no por wordo teni responsible pa su actonan. Pues debi na su estado mental, e no por wordo teni responsabel pa su actonan. “En caso e no haya e tratamento necesario, chens pa aumento di recidivismo lo aumenta” huez a sigui bisa. Den pasado a keda proba cu e sospechoso no kier tuma tratamento asina lihe. Pa e tratamento tin chens pa logra, esaki mester ta uno di duracion largo. Pesey a impone un castigo combina cu TBS. Y pesey, mirando tur lo anterior, huez a bisa di no por solamente impone un castigo di prizon, sino cu tin cu combine cu e tratamento TBS obligatorio. A bisa tambe cu mirando e circunstancia, no a maxima e medida di TBS. E castigo di prizon ta evalua basa riba e circumstancianan presenta den corte, y tur e hechonan confirma y trata. A rechaza e peticion di OM pa ehecuta un sentencia di castigo bieu di prizon di e sospechoso.
TBS A mustra tambe cu aworaki na Aruba no tin un clinica TBS. E ubicacion den un clinica asina di e acusado, ta bin na ordo despues di cu e acusado a sinta 2/3 parti di su castigo di prizon, pues mas tempran cu esaki por sosode, ta despues di 10 aña. Ta haciendo investigacion pa por habri un clinica semehante na Corsou, pa convictonan di Aruba, Bonaire, St Maarten, Saba y Statia. En caso cu e clinica aki no materializa pa e tempo ey, OM tin cu evalua pa transferi e acusado pa un clinica TBS na Hulanda.
ORANJESTAD – E asosacion di radio na Aruba (Aruba Broadcasting Association-ABA) y e fundacion DUCAPRO (registro di derecho di artista y musica) no a haya otro ainda riba e suma cu radionan tin cu paga pa por tin derecho pa toca cierto musica na nan radio. Por lo menos, den forma inoficial ya cu ningun di dos partido ‘oficialmente’ a duna un reaccion. Conforme un caso sumario un luna pasa, huez a ‘suspende’ e caso y a duna partidonan te cu 24 di April (ayera) pa yega na otro riba e suma. Di otro forma, lo mester continua cu e caso y eventualmente dicta un sentencia, cu ta traduci na un suma stipula pa corte cu radionan mester bay paga DUCAPRO pa toca cierto cancionan na nan respectivo emisora.
ORANJESTAD – E testigo principal di parti defensa den caso Flamingo, den e caso aki, e hefe di BCI, lo no por declara dilanti Huez Comisario. Asina ex minister Otmar Oduber a declara publicamente diamars. Segun e ex mandatario, Huez Comisario a informa nan diabierna ultimo cu e motibo ta cu salud di e testigono ta permiti.
ORANJESTAD – E caso riba proyecto Isla di Oro, cu a para ora cu a purba ‘wraak’ of destitui e huez en cuestion, ta continua fin di e luna aki, esta dia 29 di April proximo. Tabata dialuna cu corte a dicidi cu e peticion pa ‘wraak’ e huez, no ta valido y como tal e huez por continua trata e caso sin mas. For di informacion cu noticiacla a haya, ta mustra cu e caso lo no dura mucho largo mirando cu tabata practicamente na final di e tratamento, cu e peticion di ‘wraak’ e huez a keda solicita. E caso lo cuminsa pa 2’or y mei di atardi.
ORANJESTAD – Corte dialuna (tres huez) a dicidi cu e huez cu tabata trata e caso sumario entama pa Parke Arikock contra di proyecto na ex Isla di Oro, por keda trata e caso aki. Cu esaki e ta rechasa e peticion di parti di Gobierno di Aruba pa destitui y reemplasa e huez en cuestion di e caso en cuestion, A.vd L, di e caso, na Hulandes conoci cu e termino di ‘wraken’. Cu esaki, e caso por continua awor cu e huez en cuestion tratando esaki. E abogado di gobierno a demanda pa e huez en cuestion keda destitui di e caso, debi cu tabata parce cu e huez lo a mustra parcialidad pa cu e caso. Ora cu tin un situacion asina, e abogado por pidi pa kita e huez, osea ‘wraak’ e huez.
ORANJESTAD – Leynan y castigonan consecuente pa castiga matralto di animal (mascota) ta hopi deficiente. Asina abogado mr Lincoln “Dello” Gomez a constata e fin di siman aki. Segun e abogado, e ta referi na e caso di e cacho cu a conoce un maltrato cu a conduci na su morto finalmente. Cu esaki pueblo a pidi castigo pa e persona aki. Pero segun e abogado, e ta keda desapunta cu e leynan cu tin den un caso semejante. E abogado ta splica den e video.