APA por perde exclusividad di maneha e laman nabegable di Aruba

ORANJESTAD – Ta e intencion di gobierno (lesa: minister Chris Romero), pa kita e exclusividad di Aruba Ports Authority (APA) pa maneha e laman nabegable rond di Aruba, y duna San Nicolas Ports Authority Development asina un chens tambe. Actualmente pa ley, APA tin e exclusividad aki. Ora cu NoticiaCla a puntra e mandatario encarga cu transporte, Chris Romero dialuna mainta durante conferencia di prensa, con e ta bay atende e situacion aki, el a bisa cu lo por traha deal cu APA pa nan traha hunto. “E huristanan ta trahando riba esaki aworaki” Romero a bisa. Segun Romero, e no ta considera cu ta kita e derecho di APA pa opera, pero si, ta duna SNPAD un chens tambe. E hecho ta si, cu Romero kier pasa E ley den Parlamento proximamente (prome cu recess) pa duna SNPAD e posibilidad legal pa opera, cu mesora tambe ta kita e exclusividad di APA NV. 

E SITUACION

Pa cambia e ley actual, Parlamento, mester cambia esaki. E problema ta cu gobierno  no por djis ‘duna’ SNPA e derecho aki, sin traha un deal cu APA, conforme e ley. Y ta riba esaki e huristanan ta trahando pa wak con por logra esaki. Segun e ley, ta keda solamente na APA si e kier desvia di e parti aki cu ta trata specificamente e parti di loodsdienst na San Nicolaas, y e area en cuestion. Pues si e no bay di acuerdo, e por nenga esaki, a lo menos cu e ley cambia, y ta pone otro regla 'di wega' den e asunto aki. 

COMPETENCIA

Un otro asunto ta e hecho cu APA NV ta un compania estatal pa maneha e waf, cu personal experto. Riba pregunta di NoticiaCla, a puntra paklco no a opta pa usa APA mes y laga e bira un succursal na San Nicolas, y ta opta awor pa bin cu un departamento nobo. E mandatario no ta considere un competencia, sino mas bien cu e companianan lo por complementa otro. De hecho, esey ta e intencion segun e mandatario. 

PIPANAN RIBA TERENO

E mandatario, basa riba pregunta tambe di NoticiaCla a admiti cu tin un problema di hopi tubo riba e tereno, pero ta buscando un solucion pa esaki tambe. Aworaki tin hopi tubo riba e tereno, cu ta dificulta esaki pa convertie den un waf pa pueblo por tin acceso na dje. E mandatario sin bay den detayes specific, a duna cierto posibilidadnan pa por ‘by-pass’ e problema aki.