Abogado kier responsabilisa Hulanda pa trata asilonan na Aruba

ORANJESTAD – Abogado pa un grupo di Venezolano cu a pidi asilo politico, esta David Kock, ta hibando gobierno di Aruba y di Hulanda corte e siman aki. E ta representa un grupo di 6 persona cu recientemente a yega Aruba y a pidi asilo politico. E caso, segun Kock su comentario na NoticiaCla, ta cu Hulanda mester ‘regla’ y financia e asunto aki di prove pa e grupo aki, mientras cu nan ta warda decision si nan ta haya asilo politico. Segun Kock, cu e caso aki, e kier pa Hulanda tuma responsabilidad y paga pa e proceso aki, enbez di Aruba. Mientrastanto tanto Aruba como Hulanda den un comunicado mutuo, a bisa caba cu nan lo bringa esaki den corte diabierna proximo pa 2’or di atardi. 

E SITUACION

Kock a bira e abogado pa e grupo di 6 persona menciona. Segun Kock, Aruba ta blo bisa cu nan no por atende e asunto, y cu ta un asunto di REino Hulandes. Di otro banda, Hulanda (Reino) no kier asumi nan responsabilidad manera cu mester y ta ora cu ta cumbini nan, ta un asunto di Reino of no. Y como tal, e ta purba, den loke e ta yama un ‘test case’, pa wak si un huez por bay establece un punto porfin cu Hulanda tin cu atende cune, enbes di sconde tras di argumentonan conoci. 

DECLARACION UNI

Den un declaracion inusual, Aruba y Hulanda a saca e comunicado uni diadomingo. Segun e comunicado, “pais Hulanda y Aruba a tuma nota di un caso sumario cu a wordo entama pa en total di 6 persona di nacionalidad Venezolano cu dado momento a dicidi di pidi asilo aki na Aruba. En corto por informa cu e demandanan ta wordo rechasa y ambos pais lo presenta na Corte pa medio di abogadonan specialisa e argumentonan pakico ta di tal opinon. Por lo demas ora un caso ta bow di hurisdiccion di Corte no ta usual pa duna comentario den dataye, den cuadro di e debido respet pa e poder hudicial”. 

E CASO 

E caso mes ta poni pa tuma lugar diabierna proximo, unda cu tanto Aruba como Hulanda lo tin nan abogado, y lo confronta abogado David Kock cu lo defende e grupo di 6 ciudadanonan Venezolano. Segun Kock, nan merece, conforme acuerdonan cera, cu tanten cu un persona ta warda asilo, e por traha, y biba na e isla di espera, cu den e caso aki ta Aruba. Esey ta inclui, trabou, hospedahe y seguro di  salud (AZV). Algo cu segun Kock, lo pisa riba e presupuesto di Aruba mas ainda. Como tal, e intencion ta pa no perhudica Aruba, sino pa pone Hulanda responsabel pa esaki, conforme acuerdonan cera.