Bikker: Mester respeta decision di corte pa a laga indocumentadonan liber

ORANJESTAD – Huez comisario a laga e grupo di 9 indocumentado Venezolano den libertad. Pa hopi esaki ta bin como un baño di awa frieu, unda cu esaki no por wordo compronde pakico hueznan ta dicidi esaki. NoticiaCla a tuma contacto cu minister di husticia Andin Bikker, cu tabata corto pero directo den su contesta: “ Pa cu e grupo ey tin pa respeta desishon di Corte” Bikker a bisa brevemente. “ Lo acelera tratamento di e peticion (di asilo) pa por evalúa si nan tin derecho of no bou di e tratado” e mandatario a sigui bisa,. Mientrastanto segun e mandatario, pa cu futuro applicacion lo implementa e maneho nobo. Loke e mandatario kier men ta e maneho anuncia unda cu tur esnan gara, lo tin cu bay warda nan asilo politico na un area na Warda Costa. 

MANEHO NOBO

Den e maneho nobo anuncia pa e mandatario, lo designa centro di Guarda nos Costa como luga caminda esnan cu pidi asilo meste permanece obligatoriamente te ora tuma desishonSegun e mandatario, e situacion na Venezuela y e Tratado pa asilo di anja 1967 ta keda demanda hopi atencion di Gobierno. Ayera Corte basicamente a dicidi cu 13 di e 14 persona cu yega tera recientemente for di Venezuela lo meste wordo laga den libertad cu meldplicht si nan aplica pa asilo. Esaki den lus di Tratado menciona y e ley di 2009. Mirando e desaroyo ey y respetando e estado di derecho, Gobierno a dicidi pa acelera e proceso di desishon riba e peticionan di asilo pa den un tempo cortico por tuma un desishon riba e peticionan, ja cu mayoria biaha ta resulta cu no tin derecho pa asilo y cu hopi ta recuri na e procedura pa purba alarga estadia aki na Aruba. Na mes momento e proceso pa cambia e ley di 2009 lo finalisa e siman aki awo cu a haya advies di Raad van Advies. Ademas lo bay designa centro di Guarda nos Costa como luga caminda cu esnan ta den proceso di asilo meste keda pa warda e proceso di nan peticion. Esey ta bay significa cu si un persona yega pidi asilo e lo tin pa permanece na e centro mientras ta evalua su peticion pa asilo den un proceso den corto tempo. Di eynan cu resulta cu e no tin derecho riba asilo e lo por wordo deporta.