Plasterk no ta spera mas escalacion cu Aruba

DEN HAAG - Minister Ronald Plasterk di Relacionan di Reino  no ta spera mas confrontacion y escalacion cu Aruba riba e situacion financiero di Aruba. "Mi ta conta pronto cu un presupuesto aproba pa 2014 y 2015. Mi no ta spera mas escalacion” Plasterk ta bisa den un entrevista na Caribisch Netwerk . “Pero mi no a spera un welga di hamber tampoco den zomer” Plasterk a bisa durante e debate diahuebs riba e supervision financiero di Aruba. Durante e debate, cu a trata solamente di Aruba, Plasterk a haya hopi elogio riba e instruccion cu Conseho di minister di Reino a duna Aruba na juni ultimo, como consecuencia pa e problemanan serio di presupuesto y e aumento drastico di e debe nacional.

Solamente parlamentario Wassila Hachchi di D66 ta puntra su mes si mester a interveni di e forma ey. E ta haya cu e manera a pone un presion innecesario riba e relacionnan den Reino. “Bo mester actua fuerte riba contenido, pero no riba e relacionnan” Hachihi a bisa. Como tal e ta tratando di pidi Raad van State pa conseho riba e legalidad di e instruccion. “Riba esey no mag tin ningun duda”.

Pa e partidonan VVD y SP tin un otro problema. Nan tin miedo ainda cu Hulanda tin cu bay paga debe di Aruba si e no por paga su propio debenan. Pa tanto Andre Bosman como Ronald van Raak, e tabata un chens pa bin cu e proposicion pa no tene Hulanda responsabel mas pa e finanzas di e otro paisnan den Reino. Ta straña Bosman cu Aruba a fia placa di Corsou, mientras cu ambos pais tin un debe creciente. “Esey por sin mas?” Bosman a puntra. Segun Plasterk, esey por pasobra e ta un prestamo interno. E parlamentario di PvdA Roelof van Laar a recorda Plasterk tambe pa corda riba su promesa pa traha riba e ‘geschillenregeling’ cu tin cu resolve conflicto entre e paisnan den futuro. .

Pa Jamila Baaziz di Caribisch Netwerk. Foto archivo Jamila Baaziz