Minister Bikker kier redobla varios ley contra abuso

ORANJESTAD  – Minister di husticia Andin Bikker kier redobla varios ley cu tin di haber contra abuso. Asina el a indica diahuebs durante un conferencia di prensa di gobierno. Mes momento el a sigura si cu husticia mester ta e ultimo fase pa recuri na momento di violencia. E la mustra tambe cu tin un analisis profundo pa loke ta e cambionan di ley, unda cu ta encamina crisis plan social. Y pa loke ta e fase hudicial, e kier amplia amplia esaki. 

MELDPUNT

E mandatario a haci mencion di e asina yama ‘meldpunt’ cu mester keda introduci fin di e luna aki. E meldpunt cu ta den codigo civil for di 2016, den e concepto, a keda decreta cu pa 1 juni 2019, cu ta entre articulonan 243a te cu c, cu ta drenta na vigor. Esey ta encera cu p.e. ora un professional den su ambito  constata algo, e no mester tin miedo di bay haci melding y señala esaki.  

CASTIGONAN MAS HALTO

E castigonan cu tin aworaki, ta bay cambia segun e mandatario. Nan ta hopi aboumanera p.e. si un persona induci un menor di edad cu regalo, pa haci maldad, e castigo ta ‘apenas’ 4 aña. E mandatario kier redobla esaki pa 8 aña. E otro cu e kier aumenta ta e ley maximo di 12 aña y hacie 16 aña. E codigo penal nobo cu ta data di 2012, undac cu un persona cu haci e delito di mas pio, por haya libertad condicional, despues di a sinta 2 tercera parti tambe e kier cambia. Esaki den forma cu kier cambia e pensamento y ley, unda cu e persona en cuestion no ta bin na remarke pa haya libertad condicional, prome cu tempo. Otro cambio ta esun di castigo minimo. Segun e mandatario, tin diferente opinion riba esaki. Hueznan ta conoci di no ta pro esaki pasobra nan no tin e libertad den caso specifico e ora pa desvia di esaki. Como tal mester tin prueba, cu e castigo minimo ta bisa realmente cu e por haya e castigo minimo. “Pero e norma mester ta e castigo minimo” Bikker a bisa. Y den caso cu si corte haya e castigo mucho rigido, e mester por motiva esaki segun Bikker. El a mustra finalmente cu tin mandato pa bin cu leynan diferente, y ta bay sigur via Raad van Advies y unda cu ta atende cu e asina yama ‘straf beleid’. E mandatario tambe a sugeri pa cu ora cu OM atende cu caso di menor, mester pidi un castigo haltisimo. “ Mester por notifica e barrio di su presencia pa registra hendenan asin” Bikker a bisa, aunke ta conoci cu esaki ta bira un asunto dificil, ya cu den Reino Hulandes, contrario cu na Merca, esaki no ta existi ‘ainda’.